Accessibility links

якшәмбе, 4 декабрь 2016, Казан вакыты 15:28

Tärbiägä bala alğan ğailälärgä xezmät xaqı tülänä


Brifingta qatnaşqan Tatarstan Däwlät Sovetınıñ sotsial' säyäsät buyınça komitet räise Çıñğız Mäxmütov häm respublika Mäğärif ministrlıysınnan Nadejda Bıyçkova berençe çiratta balanı tärbiägä alğan ğailä belän balanı ullıqqa yäki qızlıqqa alğan ğailäne butamasqa kiräk dip belderde. Çönki balanı tärbiägä alğan ğailägä däwlät ay sayın xezmät xaqı tüläp tora, ä ullıqqa –qızlıqqa alğan balalar inde bu ğailäneke bulıp sanala.

2004 yılnıñ 1 aprelendä “Balanı tärbiägä alğan ata-analarğa tüläw häm taşlamalar buldıru" xaqındağı Tatarstan qanunı qabul itelgän ide. Anıñ nigezendä 2004 yılnı byudjettan 4 millionnan kübräk aqça qaralsa, bıyıl 19 millionnan kübräk bülengän., Mäktäpkäçä yäştäge balanı tärbiägä alğan ğailägä ay sayın - 1 meñ 800, ä mäktäp yäşendägegä - 2 meñ 300 tülänep tora. Nadejda Bıyçkova beldergänçä balalar yortında här balağa ayına 8 meñ sum aqça kitä. Dimäk bu däwlätkä faydalı bulıp çığa. Ämma ğailägä bilgelängändä berençe çiratta balanıñ fikere iskä alınuın äytte Çıñğı Mäxmütov. Şuña bala yal könnärendä, kanikul waqıtlarında älege ğailädä küpmeder yäşäp qarıy, oşasa inde ğailä belän şartnamä tözelä. Äytergä ğailälärärdä yäşärgä telämägän balalar da oçrıy ikän. Balalar yortın yaqınraq kürgännäre dä bar. Şulay uq brifingta balalarnı ullıqqa häm qızlıqqa çit il ğailäläre aluı turında da süz buldı. Mäğärif ministrlığı wäkile Rusiäneñ başqa töbäkläre belän çağıştırğanda Tatarstan bu kürsätkeç bik tübän dide. Ber yılda 90нан artıq balanı çit il ğailäse ullıqqa-qızlıqqa alğan. Amerika Quşma Ştatları belän İspaniä ğailäläre alğan bezneñ balalarnı. Şulay uq balalarnı tärbiägä alırğa sorap Tatarstanğa Rusiä töbäklärennän dä kilälär ikän. “Berençe çiratta monıñ säbäbe - tatar millätennän bulğan balanı alu teläge tora” dide Nadejda Bıyçkova. Ul Mari El'dän tatar balasın alırğa kilgän ğailäne misal itep kiterde. Ğomumän balanı tärbiägä alırğa telägän ğailä ğariza tutırğanda nindi millät, nindi dindä bulğan balanı alırğa telägänen yazarğa tieş.

Tatarstannıñ barlığı 41 rayonında tärbiägä bala alğan ğailälär bar. Ayıruça Aznaqay rayonında bu kürsätkeç zur. Biredä xakimiät başlığı andıy ğailälär öçen östämä taşlamalar da buldırğan. Kiläçäktä bu izge eşkä başqa xakimiät başlıqları da quşılır digän ömet belderde çığış yasawçılar.

Landış Xarrasova

XS
SM
MD
LG