Näfis gimnastika buyınça Rusiä berençelege 13 april könne däwam itte. Ul 12nçe aprildä başlanıp, 15-nä qädär, Qazannıñ «Basketxol» binasında ütä. Rusiä berençelege Qazanda täwge tapqır ütkärelä. Yarışlarda Tatarstanıñ äle yäş sportçıları belän bergä, Rusiä isemennän çığış yasağan ataqlı tatar gimnastikaları da qatnaşa.
«Basketxoll» binası, ber niçä köngä, Rusiäneñ iñ töz gäwdäle, näfis qızları cıyıla torğan urınğa äwerelde. Rusiä cıyılma komandası sportçılarınnan AliaĞäräeva, Läysän Ütäşevanıñ Qazanğa kilüe kötelä. Tatarstan isemennän anda Zarina Naftaliyıva, Alına Ğaripova, Läysän Zakirova da çığış yasıy. Çempionatta barlığı 90nnan artıq sportçı qatnaşa. Rusiä cıyılma komandası baş trenerı İrina Vinernıñ elekke şäkerte Alina Kabaeva, gimnastikadan kitüen iğlan itsä dä, yarışlarğa yörüdän tuqtamıy. Bu yulı ul xörmätle qunaq bularaq çaqırılğan. Rusiä berençelegeneñ açılu tantanasında, räsmi keşelär belän bergä, ataqlı tatar gimnastkaları Lilia, Rozaliä, Älfiä häm İlmira Näcmetdinovalar, şulay uq, elekke ataqlı gimnastqa Ğalimä Şugurova da qatnaşqan. Tantanada çığış yasağanda, Rusiä cıyılma komandası baş trenerı İrina Viner, tatar milläte gimnastikağa bik sälätle, sportnıñ bu törendä tatar xatın-qızlarnıñ, ana söte belän señdergän talantları açıla, dip äytkän bulğan. Sportçılarnıñ çığışların, gimnastikağa qaşıyq ğadi tamaşaçılar, balaları gimnastika mäktäplärendä şöğellänüçe ata analar qaradı. Çempionatta Mäskäw komandası älegä berençelekne alıp tora. Ol’ga Kapranova hem Vera Sessina berençe 2 urında bara. Dönya däräcäsendäge gimnastika yoldızları Läysän Utäşeva häm İrina Çaşina şäxsi berençelektä çığış yasayaçaq. Qazan qızlarınıñ yarışta kürsätkän näticäläre ciñügä ömetlänergä urın qaldırmıy. Tatarstan komandasınnan iñ yaxşı çığış yasağan Zarina Naftaliyıva älegä 51nçe urında bara. 15 aprel’dä yarışlar tämamlana, häm Yevropa berençelegeneñ qaysı komandanıñ baruı şunda bilgele bula.
Bikä Timerova.
