Accessibility links

шимбә, 10 декабрь 2016, Казан вакыты 02:10

Putin xökümäte säyäsätenä yäşlär dä qarşı çığa başladı


Vladimir Putin xökümäteneñ iqtisadi wä sotsial'' ölkädäge säyäsätenä ere biznes häm pensiädägelär genä tügel, yäş buın da qänäğätselek kürsätä başladı - sişämbedä meñlärçä yäş rusiäle Mäskäw uramnarına çığıp federal'' xökümättän üz tormış şartların yaxşırtunı häm tüläwsez belem alu mömkinlegen qaldırunı taläp itte. Şundıy cıyınnar Rusiäneñ başqa şähärlärendä dä uzdı, häm yäşlär üz çığışların kiläçäktä dä däwam itäçägen belderä.

Cıyınnar uzğan könneñ Rusiä öçen tarixi buluına işarä yasap, federal'' xökümät binası qarşında cıyılğan 4 meñläp yäş keşe başqa şiğarlär belän bergä "Gagarin buşqa uqığan ide" dip tä qıçqırdı. Sişämbedä ildä ğälämgä oça başlawnıñ 44 yıllığı da bilgelängän ide. Berençe ğälämçe Yuri Gagarinneñ buşqa belem aluın iskä töşerü yuqqa tügel - Rusiädä äzerlängän reformalar ğämälgä quyıla başlasa, älegä yuğarı belem öçen tülämägän yäşlär kiläçäktä şuşı östenlektän qorı qala ala. Moñardan tış, studentlarnı qayber sotsial'' taşlamalardan mäxrüm itü dä qarala, misal öçen, alarnıñ meditsina häm cämäğät transportın qullanu ölkäsendäge taşlamaları ğämäldän çığa ala. Studentlar fikerençä, planlaştırılğan reformalar bigräk tä fäqir ğailälärdän çıqqan yäşlärne tağın da yaman şartlarğa quya. Mäskäwdä xökümät binası qarşında ütkän cıyındağılarnıñ berse üz çığışında bu uñaydan menä närsä di:

Audio

Student stipendiälären häm möğällimnärneñ eş xaqların kütärü, tulay toraqlarda rätle yäşäw şartları buldıru taläbennän tış, qarşılıq cıyınında qatnaşuçılar yäşlärne "aqlarğa", yäğni üzeneñ uquı öçen tüli alğannarğa, häm bu xälennän kilmägän "qaralarğa" bülügä qarşı çığa. Şuşı wäzğiatne beraz tınıçlandıru maqsatında Rusiäneñ mäğärif ministrı Andrey Fursenko, däwlät sälätle häm yarlı ğailälärdän çıqqan yäşlärgä yuğarı belem aluda aqçalata yardäm kürsätäçäk dip belderä. Läkin bu üz kiläçäge öçen borçılğan studentlarnı inde qänäğätländermi, alar Rusiä xökümäteneñ, häm ayırım alğanda ministr Fursenkonıñ eşennän kitüen taläp itä. Rusiäneñ student berlekläre berläşmäse räise Oleg Denisov süzlärenä qarağanda, belem birüneñ ähämiaten añlawda alarnıñ xökümät belän tirän qarşılaqları bar.

Audio, Oleg Denisov

"Xökümät belem birüne xezmät kürsätü dip kürä häm ul xezmät tülänergä tieş dip uylıy, bez isä monı däwlätneñ kiläçägen qayğırtıp kertelgän ömetle investitsiä dip qabul itäbez, ansız däwlätneñ yäşäp qaluı häm tuaçaq törle yanawlarğa cawap birä aluı mömkin tügel" di student citäkçeläreneñ berse Oleg Denisov. Rusiädäge xällärdän qänäğät bulmawın älegä qädär nigezdä pensiädägelär genä belderep kilgän ide, xäzer inde bu yäşlär arasında da kürenä başladı. İnternetta xätta "skaji.net" - yäğni Putin xakimiate säyäsätenä "yuq dip äyt" digän maxsus säxifä dä açıldı. Monıñ başında torğan Aleksandr Korsunov, xakimiat yäşlärne barı tik däwlät mänfäğäten qayğırtu eşendä genä qullanırğa teli dip belderä:

Audio, Aleksandr Korsunov

"Däwlät, bigräk tä prezident idaräse, normal'' yäşlär säyäsäte buldıra almıy, säyäsätkä birelmägän, ä barı tik yäş buınnı üsterü maqsatın quyğan oyışmalar qoru anıñ xälennän kilmi. Yäşlärne bu, älbättä, borçıy häm alar üzlärenä kübräk iğtibar birelüen teli" di İnternetta "skaji.net" säxifäsen buldırğan Aleksandr Korsunov. Anıñ süzlärenä qarağanda, Rusiä yäşläreneñ ber öleşen şundıy säyäsi aktivlıqqa Ukraina häm Qıırğızstandağı yäştäşläreneñ täwäkällege ruxlandırğan.

Kärim Kamal
XS
SM
MD
LG