Accessibility links

пәнҗешәмбе, 8 декабрь 2016, Казан вакыты 17:14

Qolşärif mäçete niçek açılır?


Qazan Kirmänendä yañadan torğızılğan Qol Şärif mäçete 24 iyün könendä açılaçaq. Annan soñ ber ay ütkäç Kirmändäge Blagoveşçen çirkäwen dä açu tantanaları bulırğa tora. Şul xaqtağı prezident ukazı bu könnärdä dönya kürde. Xäzer isä, cämäğätçelektä, Qol Şärif mäçeten açu tantanası niçek tulaçaqlığı xaqında fiker alışular başlandı. Älegä qädär, ber genä mäçet açu tantanası xaqında da, mondıy zur yuğarılıqta söyläşkännäre yuqtır. Säbäbe dä bik ğadi

Bezneñ ğasırlar buyına küz yäşlärebez belän kötelgän waqiğabız. Çönki, ul ğadi genä mäçet tügel, ä ğädellekneñ tantanası. Çönki bez, ğasırlar buyına Qazan kirmänenä kerälmiçä, kolonizatorlardan intekkän xalıq. Bu bezneñ öçen genä tügel, şähit kitkän babalarıbız öçen dä zur şatlıq häm söyeneç

Tatarstan möselmannarı möftie urınbasarı Wälulla Yaqub fikerläre menä şulay.

İnde mäçetne açu tantanalarına kilgändä, älegä anıñ tulı proyektı yuq. Azatlıq radiosına, tantanalarnı Tatarstannıñ atqazanğan artistı İldar Xäyrullin rejiserlığınada säxnäläşterü qaralğan ikänlege mäğlüm buldı. Anıñ belän elemtägä kerdek, läkin ul nindi şartlarda Qazan Kirmänendäge Qolşärif mäçete açılaçağın äytmäde, barı tik, älegä tögäl bilgele tügel dide. Qol Şärif mäçeteneñ imamı Zöfär xäzrät, 24 iyün Qazannıñ Kirmän tiräsendäge mäydannar köne buyına bäyräm ruxı belän suğarılğan bulırğa tieş. Yärminkä mäydanında Qazan mädräsäläre şäkertläre, Qamal teatrı artistları, başqa icat ähelläre belän berlektä mäydan totsa, Musa Cälil häykäle urnaşqan, 1 may isemendäge mäydanda Tinçurin teatrı artistları bulsa, ä tantanada telägän här kem qatnaşsa, bu Qol Şärif mäçete isemenä layıq tantana bulır ide dip sanıy. Ä Tatarstan möftiyäte isä üz täqdimnären inde räsmi xakimiätkä cibärgän. Möfti urınbasarı Wälulla Yaqub söyli

Anıñ açılışı comğa könenä kiterep quyıldı. Bezneñ fikerebezçä, 12 säğättän alıp 14 säğätkä qädär dini öleş bulırğa tieş. Başta çığış yasawlar, kerep anı xozurlanu, qarap çığu, väğäz söyläw. Açılış waqıtında inde, bilgele, möğtäbär qunaqlarıbız da süz alır. Möselman illärennän kilgän, ministr däräcäsendäge keşelärgä dä süz birergä kiräk. Annan soñ da, dini çaralar başlanğançı da mädäni çaralar bulır

Qol Şärif mäçete fondı, tögäl bulmağan mäğlümatlarğa qarağanda, tantananı çaqırılğan meñ keşe tiräse qunaqlar qatnaşında ğına yasarğa niätli. Qazan Kirmänenä meñnän artıq keşe kertü – saqlıq mä’sälälären kiterep çığaruı bar digän şik bar ikän. Şul uq waqıtta, Qol Şärif mäçetenä ay quyu tantanaları waqıtında 5 meñgä yaqın keşe qatnaşqanlığın da iskärtep ütärgä kiräkter.

Çaqırılğan qunaqlarğa kilgändä isä, xakimiätkä qayber täqdimnär kertelä başlağan inde. Räsmi dini idärä üz isemlegen äzerlägän

Bez täqdim ittek inde ere möselman illäreneñ ministrların çaqırtırğa, BDB illärennän möftilärne, Rusiädä eşläwçe möftilärne çaqırırğa täqdim ittek. Şul isäptän, Tönyak kavkazdağı biş möftine dä çaqırırğa dip torabız

Şunısın da äytep ütärgä kiräk, Qol Şärif mäçete Qazan Sabantuyı aldınnan açıla. İnde tantanalar niçek uzar, nindi qısalarda bäyräm yasalır, bu xaqta kiläçäktä dä xäbär itep barırbız. Çönki mäçetlär küp, tik Qol Şärif ber genä.

Räfis Cämdixan

XS
SM
MD
LG