Accessibility links

Кайнар хәбәр

Tälğät Bariev: Qazaqlarğa qoral birep, alardan tärtip saqlatu – il öçen zur qurqınıç tudıra


Rusiä prezidentı Vladimir Putin qazaqlarnı yärdämgä çaqıra. Şuşı könnärdä genä Putin tarafınnan Rusiä Däwlät Dumasına kertelgän qararda süz menä şul xaqta bara. Qanun qabul itelsä, 600 meñ tiräse keşe räsmi räweştä qazaq digän isem astında Rusiägä xärbi xezmät kürsätä alaçaq. Vladimir Putin tarafınnan Däwlät Dumasına kertelgän Rusiä qazaqlarınıñ däwlät xezmäte turındağı qanun proyektı qabul itelsä, qazaqlar Rusiä çiklären saqlıy alaçaq, alarğa ildä tärtip saqlaw häm terrorğa qarşı köräşü mömkinlege bireläçäk, qazaqlarğa byudjettan matdi yärdäm dä kürsäteläçäk, dip xäbär itä Kommersant gäcite. Şulay uq qazaqlar törle ğädättäntış xällär näticälären yuq itüdä, ildä ekologik, yanğınnan saqlaw, däwlät iminlegen tä’min itüdä qatnaşaçaq. Deputatlarnıñ älege qanunğa nindi mönäsäbättä ikänen, yaqın arada kürerbez. Ä menä Rusiäneñ keşe xoquqların yaqlawçılar qazaqlarnıñ tärtip saqlaw niätlärenä şik belän qarıy. Alar tärtipne şaqtıy üzençälekle itep añlıylar, digän fikerdä tora Keşe xoquqları öçen dip atalğan böten Rusiä xäräkäte citäkçese Lev Ponomarev. Tatar milli xäräkäte wäkilläre dä älege qanunğa qarata şiklären yäşermi. Mäsälän, Bötentatar ictimaği üzäge räise Tälğät Bariev bu xaqta menä niçek uylıy.

Rusiä Däwlät Duması qabul itkän qararlarğa minem, ğomumän, şiklänep qarıym, çönki soñğı aralarda Duma üzen Rusiä millätlärenä qarşı xäräkät itä torğan Duma itep kürsätte. Rusiä qazaqları turındağı qanunğa da şik belän qarıym. Qazaqlarğa kilgändä, alar Sovet xakimiätennän zur zıyan kürgännär. İkençe yaqtan, alar Rusiä imperiäseneñ saqçıları bulğannar, tatarlar cilkäsenä da alarnıñ çıbırqıları şaqtıy tigän. Bu qanun mindä tağı ber şik uyata – il xalqınıñ ber öleşenä qoral tottırıp, üzegez belgänçä tärtip salığız, naçar keşelärgä qarşı köräşegez disälär, bu il öçen bik zur qurqınıç tudıra, monda grajdannar suğışı kilep çığu ixtimalı da bar. Şuşı xaqta da uylarğa kiräk

Äytergä kiräk, älege qanun proyektı qazaqlarnı räsmiläşterergä teläwçelärneñ berençe genä Däwlät dumasına möräcäğät itüe tügel. Bu xaqta törle eçtälekle qanunnar Rusiä parlamentına inde 8 märtäbä kertelgäne bar ide. Läkin alar tege yäki bu qanunnarğa turı kilmäw säbäple, kire qağılıp kilde. Älege qanun proyektlarına Dumadağı Kavkaz häm İdelbuyı respublikaları deputatları qarşı çığıp kilde, dip belderde, mäsälän, deputat Leonid İvançenko. Bu yulı qanun qabul itelügä ömetlär zur. Ul inde yazğı sessiä waqıtında uq raslanırğa mömkin. Bu xaqta Kommersantqa Dumanıñ federatsiä eşläre häm regional’ säyäsät komitetı citäkçese Viktor Grişin belderde. Qanunnıñ kire qağılmayaçağında Bötentatar ictimaği üzäge räise Tälğät Barievnıñ da şige yuq.

Gölnaz İlgizär

XS
SM
MD
LG