Accessibility links

дүшәмбе, 5 декабрь 2016, Казан вакыты 01:18

Yaqın Könçığış kördläre Talabaninıñ Ğiraq prezidentı buluın bäyräm itä


Çığışı belän körd bulğan Calal Talabaninıñ Ğiraq prezidentı bulıp saylanuı Yaqın Könçığış illärendä sibelep yäşägän millionlağan körd tarafınnan kiñ küläm bäyräm itelde. Ul arada bu waqiğanıñ ike qapma-qarşı näticäse bula ala: beryaqtan ul kördlärgä yäşägän illärendä yaraqlaşırğa yärdäm itä ala. İkençe yaqtan, kiresençä, bäysez körd däwläten tözü omtılışın köçäytep cibärä ala.

Calal Talabani Yaqın Könçığışnıñ ber ere ilendä prezident bulıp saylanğan berençe körd buldı. Londondağı Ğäräp wä İran Üzäge citäkçese Aliriza Nurizadä süzlärençä, bu waqiğa töbäktäge bar kördlär öçen zur ähämiätkä iä:

Audio (Aliriza Nurizadä)

"Talabaninıñ prezident bulıp saylanuı, minemçä, Berlin diwarı cimerelü däräcäsendäge ähämiätkä iä. Bu waqiğa bäysez körd däwläte tözü xıyalı belän yäşägän bar kördlärgä täesir itte."

Nurizadä süzlärençä, bu waqiğa, İrannan alıp Süriägä qädär, kördlär yäşägän bar töbäklärdä bäyräm itelä. Törkiä, Süriä, İran häm Ğiraq bilägän töbäklärdä barlığı 30 millionğa yaqın körd yäşi. Bäysez körd däwläten tözü bu illärneñ bötenlegenä yanaw, bar töbäkkä totrıqsızlıq kiteräçäk dip sanala. Nurizadä fikerençä, Ğiraq misalı bar kördlärgä "maqsatlarğa ayırım däwlät tözemiçä dä, demokratiä aşa ireşep bula" digän köçle ürnäk bula ala.

Ä menä Londondağı Suğış wä Tınıçlıq institutında Ğiraq belgeçe, çığışı belän körd Kamran äl-Karadaği, Talabani prezident bulğanğa ğına kördlär bäysez däwlät xıyalınnan waz kiçer dip uylamıy:

Audio (Kamran äl-Karadaği)

"Ğiraq kördläre saylawlar waqıtında üz fikeren äytte. Saylawlar belän bergä, räsmi bulmasa da, bäysezlek turında referendum ütte. Xalıqnıñ 97-98 protsentı bäysezlekne sayladı."

Karadaği süzlärençä, bu referendum şunı kürsätte: kördlär öçen bäysezlek xökümättä urın aluğa qarağanda küpkä möximräk. Talabaninıñ prezident buluı ğına monı üzgärtä almıy.

Tik, xıyal ber närsä, säyäsi çınbarlıq – ikençe. Bügenge şartlarda bäysezlekkä ireşep bulmasın körd säyäsmännäre, Talabani üze dä yaxşı añlıy. Min kördlärneñ wäkile genä tügel, Ğiraqtağı bar xalıqlarnıñ wäkile, bäysez Kördstan däwläte tormışqa aşarlıq tügel, dide ul ber çığışında.

Alay da, Karadaği fikerençä, Talabaninıñ prezident buluı Ğiraq kördlärenä üz maqsatlarına ireşüdä yärdäm itäçäk. Maqsatlarnıñ berse – neftkä bay bulğan Kirkuknı körd öleşenä kertü. Tik bu adım kördlär belän ğäräplär arasında kierenkelek artuğa kiterä ala. Sönnilär dä, şiğilär dä moña qarşı. Prezident Talabani älegä andıy niätlären iğlan itmäde. Londondağı Ğäräp wä İran Üzäge citäkçese Aliriza Nurizadä süzlärençä, Yaqın Könçığış ğäräpläre anıñ aqıl belän eş itäçägenä ışana:

Audio (Aliriza Nurizadä)

"Ul Mısırnıñ elekke prezidentı Naser, İordan patşası, ğäräp illäre, xättä Süriä belän yaxşı mönäsäbätlärdä tordı."

Şuña kürä ğäräplär Talabaniğa ışana, di Nurizadä. Anıñ urınına başqa körd citäkçese saylanğan bulsa, bälki başqça bulır ide.

-Ali Gilmi
XS
SM
MD
LG