Accessibility links

шимбә, 10 декабрь 2016, Казан вакыты 00:22

AQŞ Qırğızstandağı xärbi bazasın qaldırırğa röxsät aldı


Bügen Bişkäkkä kilgän AQŞtatları saqlanu ministrı Donald Rumsfeld, Qırğızstannıñ yaña citäkçelegen yaqlawın häm Qırğızstandağı amerikan bazasınıñ qalaçağına ömet belderde. Respublikanıñ prezidentı wazifaların başqaruçı Kurmanbek Bakiyev, Quşma Ştatlarnıñ Äfğanstandağı xärbi çaraları öçen xezmät itkän baza Qırğızstanda qalaçaq, dip belderde. 11 sintäber höcümnärennän soñ Qırğızstan xökümäte Amerikan ğaskärlärenä Bişkäk çitendäge Manas hawa alanı yanında xärbi bazanı qullanışqa tapşırğan ide. Rumsfeld, Waşintonnıñ, Qırğızstannıñ yaña citäkçelege, respublikanı totrıqlı demokratiä yulına çığarır digän ömetlären citkerde. Urınınnan töşerelgän prezident Asqar Aqayevnıñ qızı Bermet Aqayeva bügen kötelmägändä parlament utırışına kilde. 24 martta Aqayevlar ğailäse Bişkäktän çığıp kitkännän birle – bu – yaña saylanğan deputat bularaq anıñ berençe tapqır Qırğızstanda kürenüe buldı. Binadan çıqqaç jurnalistlarğa ul, Qırğız xalqı belän qarşılıqlar bulmas, dip ömetlänüen belderde: "Minem kire qaytuım kemne dä bulsa borçıy dip uylamıym, min ğadäti deputat, häm minem monda buluım nindi dä bulsa problemalar tudıra dip uylamıym", dide Aqayeva. Elekke prezident qızınıñ qaytuına protest belderep parlament binası qarşına 100gä yaqın keşe çıqtı. Parlament başlığı Omurbek Tekebayev, Bermet Aqayeva äle räsmi töstä wazifasına kereşer öçen ant kitermägän, dip belderde. Bermet Aqayeva süzlärenä qarağanda, şulay uq deputat itep saylanğan bertuğanı Aydar da, Qırğızstanğa qaytırğa mömkin.

XS
SM
MD
LG