Accessibility links

Кайнар хәбәр

Kitapxanäçelek eşen üsterü


Tatarstannıñ mädäniät ministrlığı 2000 nçe yılda “Lider” häm “İcadi ezlänü” digän premiälär buldırdı. “Lider” premiäse üzäkläşterelgän kitapxanälär sistemasınıñ bersenä, yıl näticäläre buyınça tapşırıla. “Lider” premiäse aktiv eşçänlek häm yuğarı sıyfatlı xezmät kürsätü, “İcadi ezlänü” - yaña alımnar qullanu häm icadi ezlänülärgä initsiativanıñ köçle buluı öçen bilgelänä. Ul öç nominatsiä dän tora: “Üzäk kitapxanä”, “Şähär kitapxanäse” häm “Awıl kitapxanäse”. Şunısı qızıqlı, bu premiägä ayırım kitapxanä genä tügel, xätta, ber kitapxanäçe yä kitapxanäçelär törkeme dä layıq bula ala ikän. Yıl axırında ciñüçelärne açıqlaw öçen, oyıştıru komitetı tözelgän. Ul Mädäniät ministrlığı häm Tatarstannıñ iñ zur kitapxanäläre: Respublikanıñ Milli, balalar, yäşüsmerlär häm suqırlar öçen maxsus kitapxanäläre wäkillärennän tora. Töp oyıştıruçı isä Milli kitapxanä.Älege premiälär Tatarstanda kitapxanäçelek eşen üsterü, yaña mäğlümat çaraların üzläşterü häm kitapxanäçelärneñ icadi ezlänülären arttıruğa etärgeç bulır dip sanıylar oyıştıruçılar.2004 yıl näticäläre buyınça “Lider” premiäsenä Yäşel Üzänneñ üzäkläşterelgän kitapxanäläre layıq bulğan. “İcadi ezlänü” premiäseneñ “Üzäk kitapxanä” nominatsiäsenda – yaña mäğlümatı texnologiälärnı uñışlı qullanu häm “Moy gorod çudnıy, drevniy, lyubimaya Qazan” kompakt-diskın yasağan öçen Qazan üzäk kitapxanäse bilgelängän;“Şähär kitapxanäse” nominatsiäsenda – uñay imidj tudıru häm qullanuçılarnı qızıqsındıru buyınça uñışlı eşçänlek alıp barğan öçen Aznaqay rayonınıñ Aqtübä kitapxanäse ciñep çıqqan; “Awıl kitapxanäse” nominatsiäsenda – Bögelmä rayonınıñ Zelenoroşçinsk kitapxanäse büläklänäçäk. Şulay uq, bu nominatsiädä Täteş rayonınıñ Olı Tarxan awıl kitapxanäse tuğan yaqnı öyränü buyınça tirän eşçänlek alıp baru häm tatar ädäbiäten aktiv propagandalaw öçen Milli kitapxanäneñ maxsus premiäsen alaçaq. Xäyer, näticälär bügenge köndä bilgele bulsa da, büläkläw älegä ütkärelmägän. Premiälär may ayında ğına tapşırılaçaq.

Aydar Camali

XS
SM
MD
LG