Accessibility links

якшәмбе, 11 декабрь 2016, Казан вакыты 11:01

Tatnet : tatar yegetenä niçek tatar qızı belän tanışırğa?


Tatar-internet cämäğätçelek öçen – «Tatnet yoldızları-2005» bäygeseneñ başlanıp kitüe töp yañalıq bulıp tora. İñ yaxşı tatar internet säxifäse – nindi bula, anı kem yasağan? Bu sorawlarğa cawapnı ber niçä aydan belersez. Xäzergä bäyge başlana ğına. Belgänegezçä, älege yarış internet säxifälär arasında ütkärelä. «Tatnet yoldızları2005», dip atalsa da, anda tatar telendäge genä tügel, tatarlarğa qağılışlı bulğan barlıq saytlar qatnaşa. Bäyge inde berniçä yıl rättän ütkärelep kilä häm yıldan yıl, citdiräk tös alıp kilä. Yırışnıñ bıyılğısı «Tatmedia» agentlığı başlanğıçı belän ütkärelä. Bäygeneñ räsmi internet säxifäse xäbär itüençä, eş başlap cibärügä 2 genä atna, ä jyuri iğtibarına inde 20läp qatnaşuçıdan ğarizalar kilgän. Proyektnıñ citäkçese, Mäskäw yegete häm Tatar internetınıñ entuziastı Aynur Sibğätullin tatnet.tatar.info saytın alıp bara häm anda yaña mäğlümatlar urnaştırıp tora. Xäzerge waqıtta 13 sayt jyuri tarafınnan tikşerelep, bäygedä qatnaşırğa çaqırılğan. Ütkän yılda, yarışta qatnaşqan saytlar bıyıl da üz köçlären sınap qararğa bulğan. Şunıñ belän bergä yaña barlıqqa kilgän saytlar da «Tatnet yoldızları» bäygesendä üzlären kürsätergä telägän. Mäsälän, yañalar arasında romay-yuldash.narod.ru – Romay Yuldaşevnıñ şäxsi internet säxifäse, kunak.ru – Mäskäw tatar yäşläreneñ yal itü klubınıñ säxifäse, www.luiza-m.narod.ru – Luiza digän atelyenıñ säxifäse, www.1000kzn.ru – «1000 yıllıq Qazan» - xäbärlär saytı häm başqa yaña web-bitlärne kürep bula.



Zamança küñel açu çarası, «tere jurnal», yäğni global çeltärdä köndälek alıp baru, tatarlarda da bar. Ämma, www.lifejournal.com

kebek bilgele sayt räweşendä tügel, ğadi forumnar sıyfatında ğına. Tatar säxifäläreneñ forumnarı qaysıber waqıtta, ayırım keşelärneñ kondäleklärenä oxşap tora. İnde yuldash.com kebek populyar tanışular satında 19 yäşlek Mäskäw yeğete qızlar belen tanışu omtılışları uñışsızlıqlarğa oçrawı turında qayğılı fikerlär belän büleşkän. İnde 1 yıl buyı anıñ anketası şuşı tanışu agentlığınıñ säxifäsendä elenep tora ikän, ämma monıñ näticäse yuq ikän haman. Yeget, aqıllı da çibär dä tatar qızın ezläp arğan, inde başqa millät qızları belän tanışırğa riza, bu wazğiättä ni eşlärgä qala, dip yeget forumçılardan kiñäş sorıy. Anıñ kebek uq, yegetlär nindi kiñäş birä disezme? Berse, sin bit äle yäş, üzeñä nasıyp yarıñnı oçratırsıñ, dip uyatalar. İkençese, änä qızlar anketaları elengän bülek bik bay, üzeñ tot ta yaz qızlarğa dip kiñäş birä, öçençe keşe – teläsä kemgä ğaşiq bulırğa mömkin, ämma nıqlı ğailä tözep, ber bersen añlaşıp yäşäw öçen üz millät wäkilläre belän öyläneşü äybäträk, dip fikerläre belän urtaqlaşa başqalar.Bu tema www.yuldash.com saytınıñ forumçıları arasında zur qızıqsınu uyattı, çönki şuşı 19 yäşlek Mäskäw yegete oçrağan problemalar, şulay internet aşa tanışqan, başqa keşelärgä dä tanış. Kemder, çeltärdä, çınnan da, nasıyp yarıñnı tabıp bula, dip sanıy, kemder – bolay waqıt ütkärer öçen tanışırğa mömkin, di. Ägär sez dä bu söyläşülärdä qatnaşırğa telisez ikän. www.yuldash.com saytınıñ forumına küz salığız.

Bikä Timerova.

XS
SM
MD
LG