Accessibility links

якшәмбе, 11 декабрь 2016, Казан вакыты 11:02

Narkomaniä turında mäğlümät çaraları ni söyli?


Narkomaniä buyınça respublikada soñğı dürt yılda totrıqlılıq küzätelä. Monda Tatarstannıñ narkomaniägä qağılışlı maxsus programmaların qabul itüe dä, massaküläm mäğlümat çaralarnıñ da öleşe bar. Şulay da respublikanıñ kön'yak-könçığış rayonnarında häm Qazanda bu ölkädä xällär şaqtıy qatlawlı bulıp qala. Äle bit Tatarstan Rusiädä narkomaniä buyınça berniqädär totrıqlılıqlı sanala. Statistika mäğlümatlarına qarağanda narkomaniäneñ yäşe 15tän 29 qädär. Zamança yäşärgä teläwçe bügenge yäşlär arasında sälämät yäşäw räweşenä moda barlıqqa kiterü mäğlümat çaralarınıñ töp maqsatlarınıñ berse bulırğa tieş. Keşene matur kiem, bizänü äyberläre genä tügel, ä iñ äüwäl sälämätlek bizäwe xaqında häm anı saqlarğa kiräklege turında söyläw bu oçraqta bik urınlı. Respublika narkodispanserınıñ baş tabibı Färit Fättäxov äytüençä, soñğı yılda narkomaniädän üz teläkläre belän qotılırğa teläwçelär sanı arta. Häm bu mäğlümat çaraları eşçänlegeneñ dä näticäse di ul. Şulay da bügen mäğlümat çaraları narkomaniä belän köräşüdä tieşle däräcädä eşlime soñ? Älege afät turında xalıqqa mäğlümat taratu öçen däwlät bülgän aqçalar üzlären aqlıymı?
Küp kenä mäğlümat çaraları, ä bigräk tä rayonda eşläwçelärdä professional'lek yuqlığı küzgä taşlanıp tora, üzeşçänlek xökem sörä. Häm näticädä xalıqqa tieşle mäğlümatnı citkerü, ä dimäk problemanı çişü buyınça tieşle eş başqarılmıy. Mäsälän, “Mäğrifät” gäzite. Narkomaniäne yaqtırtu öçen älege basmağa uzğan yılda 20 meñ sumlıq grant bülenep birelgän häm yılnıñ oktäber-dekaber aylarında narkomaniägä qağılışlı barlığı 2 material dönya kürgän. “Tatarstan yäşläre” 40 meñ alğan, 3 material bastırğan. Rayon gazetalarınnan “Zaman sulışı” gazeta 20 meñlek grant alğan, 2 material çığarğan, “Zäy ofıqları” da 20 meñ alğan häm 1 genä yazma bastırğan. Jurnallar arasında isä “Mäğärif” 50 meñ, “Mäydan” 30 meñ häm “Tatarstan” jurnalı 50 meñ sum aqça alğannar, şulay da narkomaniä turında mäqälälär yazu belän mawıqmadılar. “Yaña Ğasır” televideniesendä çığuçı “Tin-klub” tapşıruına narkomaniäne yaqtırtu öçen 50 meñ sum bülengän, barlığı 2 tapşıru dönya kürgän. “Variant” kanalınıñ “Pozitiv” tapşıruına 65 meñ birelgän, 1 material äzerlägän. “Yaña Ğasır” radiosınıñ “Tвое время” tapşıruı öçen 30 meñ, “Tatarstan” radiosınıñ “Serdäşxanä” tapşıruına 50 meñ sum bülensä dä, narkomaniä turında alarnıñ tawış-tınnarı da çıqmağan. “Tatar-inform” mäğlümät agentlığı 50 meñ sumlıq grant alğan, 40 mäğlümät, 2 intervyu äzerlägän.
Älege mäğlümät çaraları arasında “Koмсомольская правда” gazetı «Efir» kanalınıñ “Labirint”, “Веселые старты” tapşıruları ğına berniqädär alda bara, tieşleçä yaqtırtırğa tırışa. Ämma bik kür massaküläm mäğlümät çaraları temağa kerep kitep, problemanıñ möhimlegen açarğa aşıqmıy, zur aqçalar suğa töşep yuğala. Qısqası, narkomaniä belän köräşkändä aqça ğına tügel, ä qızıqsınu häm namus ta kiräk.
Al'bina Zäynulla.

XS
SM
MD
LG