«Berdäm Rusiä» firqäse, şimbä, 16 april könne, çirattan tış qorıltayın ütkärde. Xakimiät firqäseneñ iğtibar üzägendä xäzer munisipal saylawlar tora. Başqa säyäsi köçlär kebek uq, «Berdäm Rusiä» firqäse cirle xakimiät oyışmalarında da üz keşelären kürergä telär ide. Häm soñğı utırışta, partiäçelär, saylawlarğa nämzätlär isemlegen tözü turında iğlan ittelär. Soñğı waqıtta firqä ütkärgän säyäsätneñ beraz ğına üzgärüen küzätep bula. İñ zur yañalıq – xakimiät firqäseneñ üzenä tänqidi küzlektän qararğa omtıluda. Utırışta, firqä wäkilläre, taşlamalarnı aqçağa äyländerü reformasınıñ näticäse öçen aqlanırğa mäcbür buldılar, tieşençä añlatu bulmadı, didelär. Firqädä torğan keşelär sanın tikşerep, rastrlatqanda da, ber ük keşelärneñ ber niçä tapqır yazıluın, inde wafat bulğan keşeläreñ isemleklärdän çığaralmawın häm başqa tögälsezleklär barlığın tanıdılar. Inde raslanğan isemleklär buyınça, şuşı federal firqäneñ Tatarstan bülegendä, 75 meñläp keşe toruı turında iğlan itelde. Firqäneñ nigezlämäsenä dä tänqit belderelde. Rayon häm awıldağı saylawlarğa nämzätlärne bilgelägändä dä, alarnı firqäneñ General Şurasında Mäskäwdä raslatırğa kiräk ikän. Bu mäs’älädä, Tatarstan wäkilläre firqäneñ nigezlämäsenä tözätmä kertergä täqdim itte. Ciñüneñ 60 yıllığın, Qazannıñ 1000yıllıqın bäyräm itkändä dä, firqä üzen kürsätergä teli, şuña barlıq çaralarda qatnaşırğa plan qora.
Cirle bülekçälär aldında xakimiät firqäse, awıl cirendä firqägä ışanıçnı arttırırğa, firqä kürsätkän nämzätlärğä teläktäşlek kürsätergä täqdim itte.Sotsial reformalarnıñ awılda niçek qabul itüläre häm pensionerlarıñ xäle turında, Berdäm Rusiä firqäneñ Älki başqarma komitetı başlığı Ğaliullin Tahir äfände belän söyläştek. Anıñ äytüençä, awıldağı sotsial wäzğiät ciñel tügel, ämma tieşle oyışmalar kierenkelekne buldırmasqa tırışa.
Firqä qorıltayında säyäsi Şura saylandı. Ellekke säyäsi Şurağa kergän keşelärneñ küpçelege üz urınnarın saqlap qaldı. Säyäsi şura särkätibe itep qabattan Färit Möxämmätşin saylandı.Bikä Timerova.
