Accessibility links

шимбә, 10 декабрь 2016, Казан вакыты 23:38

Räşit Wahapov büläge İlham Şakirovqa birelde


Räşit Wahapov cır festivale çın bäyrämgä äwerelde. Ul kiçne Qamal teatrında Finlyandiya, Tübän Novgorod, Sankt-Peterburg, Başqortstan häm tağın küp kenä cirlärdän kilgän millättäşlärebez bar ide. Festival' alarnı yänä bergä küreşterde, yılğa ber bulsa da aralaşırğa mömkinlek tudırdı. Şuñadır mondağı xalıq zur ber ğailäne xäterlätte.

Tatarstan Premyer-ministrı urınbasarı wazıyfaların başqaruçı Zilä Wälieva respublika prezidentınıñ qotlaw xatın citkerde.

Tatarlar uqmaşıp yäşi torğan bik küp töbäk wäkillären cır-moñ aşa qawıştırıp tatar xalqın ruxi yaqtan berläşergä häm respublikabıznıñ abruyın nığıtuğa zur öleş kertte, Rossiä cämğiätendä millätara tatulıqnı nığıtuğa yärdäm itte. Bügenge konsert-tamaşa Tatarstannıñ mädäni tormışında kürkäm waqiğa, anıñ borınğı häm mäñge yäş başqalası Qazan şähäreneñ danlı yubileena tağın ber zur büläk bulır dip ışanam

Festival'ne başlap yörgän “Tatarstan” jurnalı baş möxärrire Rifat Fättäxov älege konsertnıñ Qazaqstan, Başqortstan, Peterburg, Yekaterinburg, Mäskäwdä niçek uzuları turında qısqaça söyläp kitte. Milli cırğa, moñğa susağan millättäşlärebezneñ bu festival'ne söyenep qarşı aluların assızıqladı. Töşerelgän videotasmadan Amerikadan Şämsiä Apaqay, Finlyandiädän Abdulla, Ölkä Alilar häm tağın küp kenä tatarlarnıñ Räşit Wahapov turındağı istälekläre yañğıradı.

Konsertta isä Räşit Wahapov repertuarınnan bulğan cırlar yañğıradı. Alarnı Venera Ğaniewa, Ferdinand Säläxov, İdris Gaziev, Aydar Gabedinov häm tağın küp kenä tanılğan cırçılar başqardı. Şulay uq säxnädän Räşit Wahapovqa bağışlap yazılğan şiğerlär uqıldı. Çittäge qunaqlarıbız da buş qul belän kilmägän ide. Finlyandiyadän Räif Nizametdin tamaşaçılarnı “Cämilä” cırı belän söyenderde,

Başqortstannan kilgän İlham Wäliev "Menärgä ide Ural tawlarına" cırı belän xalıqnı tañ qaldırdı, monnan tış Färidä Kudaşeva, Abdulla häm Ölkän Alilar, başqa küp qunaqlar çığış yasap festival'neñ tatar mädäniäte öçen bik zur waqiğa buluın assızıqlap uzdılar. Onıtıla başlağan R. Wahapovnı kire tatar xalqına qaytaruğa üz köçlären qızğanmağan oyıştıruçılarğa räxmätlären belderdelär.

Festival'neñ onıtılmas minutları azaqta buldı. İlham Şakirovqa Räşit Wahapov isemendäge milli ictimaği premiä birelde. İlham Şakirovnıñ böten zalnı tutırıp "Yaña qara urman" cırın başqaruı tamaşaçılar öçen zur büläk buldı.

Landış Xarrasova

XS
SM
MD
LG