Accessibility links

чәршәмбе, 7 декабрь 2016, Казан вакыты 00:57

Dönya katolikları "aq töten" kötä


Sişämbedä Vatikannıñ Sikstin pulatında katolik çirkäw kardinalları kiläse Rim Papasın saylaw eşen däwam itte. Dönyanıñ törle ilennän kilgän 115 kardinal üzläre arasınnan 2 Aprildä wafat bulğan İoann Pavelğa almaş saylıy. Tawışlarnıñ öçtän-ikesen cıyğan kardinal yaña papa bulaçaq. Düşämbe kiçen häm sişämbe irtän ütkän tawış birülär näticä kitermäde. Bar dönya katolikları bu könnärdä Sikstin pulatı tübäsennän çıqqan tötenne küzätä.

Elek-elektän kilgän ğädät nigezendä yaña papanıñ saylanu-saylanmawın Sikstin pulatı tübäsendäge morcadan çıqqan töten xäbär itäçäk. Aq töten çıqsa – papa saylanğan digän süz, qara töten çıqsa – äle saylanmağan. Kardinallarnıñ yäşeren cıyını, conclave''ta, dönyanıñ 52 ilennän kilgän 115 kardinal qatnaşa. Alar üzläre arasınnan yaña papa saylıy. Rim papası bulu öçen tawışlarnıñ öçtän-ikesen, yağni 77 tawış qazanu kiräk. Tawış birülär şul san cıyılğançığa qädär däwam itäçäk. Alar könenä 4 tapqır ütkärelä, ikese - köndezge 12dä, tağın ikese - kiçke 7dä. Här ikesennän soñ bülletennär yandırıla. Sikstin pulatı tübäsennän çıqqan töten - şul.

Tawış birü waqıtı citkän sayın Vatikannıñ izge Petr mäydanına tötenneñ tösen kürergä dip distälägän meñ keşe cıyıla. Televidenie kanalları morcanı turı efirda kürsätä. Töten kebek xäbärläşü çarasınıñ uñaysız yaqları da bar. Yış qına, bigräk tä yıraqtan qarağanda, anıñ tösen ayırıp bulmıy. Şunı iskä alıp, bu yulı papa saylanğan oçraqta, izge Petr çirkäwennän çañ suğaçaq.

Berençe butalçıqlar inde buldı da. Sişämbe köndez tawış birüdän soñ, tötenneñ töse başta aq bulıp kürengäç, mäydanda dulqınlanu başlandı. Läkin soñraq töten qaraldı. Çañ suğu da köndezge 12ne añlatqan bulıp çıqtı.

Conclave waqıtında kardinallarğa basım-fälän bulmasın öçen, alarğa elemtä çaraların, telefon, internet qullanu, xättä gäzit uqu tıyılğan. Çıbıqısız elemtäne buldırmas öçen tawış Sikstin pulatı tiräle maxsus ekran qorılğan. Reutersnıñ Vatikan belgeçe Philip Pullela süzlärençä:

Audio (Philip Pullela)

"Küräseñ säxnä-artı söyläşüläreneñ kübese kardinallar yäşägän Santa Marta utırmasında bara. Alar anda tawış birüdän soñ, köndez häm kiçen oçraşa."

Şulay itep düşämbe kiçen häm sişämbe köndez ütkän tawış birülär älegä näticä kitermäde. Namzätlärneñ berse dä tawışlarnıñ öçtän ikesen qazana almadı. Vatikannan sarqıp çıqqan mäglümätlärgä qarağanda, köräş konservativ qaraştağı alman kardinalı Joseph Ratzinger belän salmağraq qaraştağı italian kardinalı Carlo Maria Martini arasında bara.

-Ali Gilmi
XS
SM
MD
LG