Accessibility links

Кайнар хәбәр

Tuqay büläge kemgä bireler?


Tuqaynıñ tuğan köne, Şiğriät bäyräme belän bergä , şağirneñ isemen yörtüçe däwlät bülägen birü köne dä yaqınlaşıp kilä. Bu waqiğalar 26 aprildä bulaçaq. Matbuğatta, bıyılğı Tuqay bülägenä däğwä itüçelär üzläre häm alarnıñ icatları turında mäqälälär basılıp kilä. Älegä cämäğätlelek wäkilläre arasında fiker alışu bara. Bıyılğı büläkne kem alır, qaysı şäxes layıqlıraq, büläkneñ soñğı yıllarda däräcäse üsteme, yuqmı? Bu sorawlarnı tatar zıyalılarına birdek.

Ğabdulla Tuqay isemendäge däwlät premiäse, başqa yıllardan ayırılmalı bularaq, yaña statustağı komissiä tarafınnan bilgelänä. Büläkneñ aqçalat küläme dä 300 meñğä qädär artırıldı. Prezident qarşında Komissiä tözärgä häm Tuqay bülägenä kübräk aqça birergä, digän qararlar, 2004 yılnıñ soñğı könendä, 31nçe dekaberdä dönya kürgän ide.

Tuqay bülägen bilgeläwgä üzgäreşlär kertü turında üze dä zamanında Tuqay bülägen alğan professor Mäxmüt Niğmätcanov ta uylanğan bulğan ikän. Anıñ fikerençä, Tuqay büläge tantanasında töp rol’ne yazuçılar tügel, ä xökümät citäkçeläre uynarğa tieş.

April başında, bıyılğı nämzätlär isemlege iğlan itelde. Alarnıñ isemnären isegezgä töşeräbez. «Köy ezläw», «Ut arqılı sikerü» şiğri cıyıntıqları öçen şağir Xarras Ayup, muzıka üseşenä kertkän öleşe öçen kompozitor Luiza Batır-Bolğari, zamandaşlar portretların icat itü öçen rässam Zöfär Ğimaev, «Därt çülmäge» digän şiğri cıyıntıq öçen şağir Röstäm Miñğalim, «Mäñgelek Qazan» digän tarixi räsemnär öçen Firinat Xalikov, «Mönäcätlär», «Awıl köyläre» digän xor konsertları öçen kompozitor Şamil Şärifullin kürsätelgän. İnde Tuqay bülägen iäse, Qazan utları jurnalı baş möxärrire, şağir Rawil Fäyzullin da isemlek belän tanışqan. Xäl itü xoquqı bulsa, kemgä büläkne birer idegez?-, digän sorawğa ul bolay cawap birde: «Berençe itep küñelgä kompozitor Şamil Şärifullin kilä, anıñ tatar xalqınıñ muzıkasın propagandalawğa kertkän öleşe zur, şağirlärdän, ikese dä layıq, ämma miña zamandaş bularaq, Röstäm Miñğalim icatı yaqınraq. »

Sez dä, Tuqay büläge turındağı söyläşülärdä qatnaşırğa teläsägez, bezgä xatlar yazılığız. Bu tema aldağı tapşırularda da däwam iteler.

Bikä Timerova.

XS
SM
MD
LG