Accessibility links

сишәмбе, 6 декабрь 2016, Казан вакыты 03:47

Tatarstanda Ana tele unkönlege başlandı


Qazannıñ aviaberläşmäsendä TU-334 oçqıçları cıyılaçaq. Bu xaqta qararnı Rusiä premyer-ministrı Mixail Fradkov imzaladı. Bu eşkä aqçanı federal’ häm respublika qaznasınnan biräçäklär. Narkotik matdälärgä qarşı köräş buyınça federal’ idäräneñ respublika bülege citäkçese Şamil Däwlätgildeev layıqlı yalğa kitä. Anıñ wazifaların älegä Däwlätgildeevnıñ urınbasarı bulıp eşlägän İlgiz Miñnullin başqaraçaq. Xäyer ul wazifalarnı başqaruçı bulıp ozaq tormas, tiz arada anı bu urında räsmi räweştä raslarlar, dip kötelä. Şulay itep, respublikada narkotiklarğa qarşı köräş eşe citäkçeleksez qalmayaçaq.

Qazanda bu könnärdä çittän kilgän millättäşlärebez qunaq bula. Alar meñyıllıq Qazan belän tanışıp yöri, üz illäre belän Tatarstan arasında mädäni häm iqtisadi elemtälär urnaştıra. 20 aprel’ könne Bötendönya tatar kongressında Finländiädän kilgän tatarlar belän oçraşu uzdı. Anda kongress citäkçelege häm Qazanğa Räşit Wahapov festivaleneñ yomğaqlaw kiçäsenä Finländiädän kilgän millättäşlärebez qatnaştı. Sişämbe könne tatarstanğa Ukraina häm Belarus’tan dä ber törkem tatarlar kilde. 21 aprel’dä alarnı da Tatar kongressında qızıqlı oçraşu häm aralaşu kötä. Ä älegä Ukraina häm Belarus’ tatarları wäkilläre tarixi watannarı, anıñ borınğı başqalası belän tanışa, eşlekle dairälärdä söyläşülär alıp bara, maxsus alar öçen äzerlängän mädäni programmada qatnaşa.

Ä ul arada respublikada 26 aprel’ – Ana tele könenä bağışlanğan Ana tele unkönlege başlanıp kitte. Çärşämbedä älege çara qısalarında tatar kitapları kürgäzmäse açıldı. Ul Duslıq yortında ütä. Şul uq könne tatar studentlarınıñ festivale dä başlandı. Yäşlär säxnäse dip atalğan festival’dä respublika uqu yortlarında eşläp kilüçe tatar teatr studiäläre çığış yasayaçaq. Ğomumän, Ana tele unkönlege qısalarında şaqtıy ğına qızıqlı çaralar ütkärü küz aldında totıla. Älege eştän respublikanıñ Däwlät Şurası da çittä qalmasqa bulğan. Tatar-inform agentlığı xäbärlärenä qarağanda, 22 aprel’dä Däwlät Şurasında uzaçaq respublika fänni-ğämäli konferensiäsendä tatar telendäge terminologiäne kamilläşterü mäs’äläläre tikşereläçäk.

Gölnaz İlgizär

XS
SM
MD
LG