Accessibility links

якшәмбе, 4 декабрь 2016, Казан вакыты 00:47

Condoleezza Rice: Putin öçençe märtäbä prezident bulu öçen konstitutsiäne üzgärtä almıy


Qısqa säfär belän Mäskäwgä kilgän amerikan däwlät sekretare Condoleezza Rice çärşämbedä Rusiä prezidentı Vladimir Putin belän oçraştı. Belgeçlär aldan uq, bu yulı Quşma Ştatlarnıñ däwlät sekretare Rusiä citäkçeläre belän söyläşülärendä ildäge demokratiäneñ ayanıç xäle mäs''äläsen kütärer dip farazlağan ide. Mäskäwgä kiler aldınnan ğına, misal öçen, Rice xäbärçelärgä, ägär dä Putin öçençe märtäbä dä prezident itep saylanu öçen konstitutsiäne üzgärtsä, bu döres närsä bulmas ide dip belderde.

Rusiä citäkçeläreneñ, ayırım alğanda prezident Putinneñ soñğı yıllarda ildäge demokratiäne qısuın tänqitläwne däwlät sekretare Rice äle Mäskäwgä kilep citkänçe ük, hawada başladı, xörmätle tıñlawçılar. Üze belän oçqıçta bulğan xäbärçelärgä ul Washingtonnıñ Rusiädäge mäğlümat çaraları ireklegeneñ bulmawı, federal'' xökümätneñ bar qüwätne üzendä tuplawı, töbäk citäkçelären dä üzäktän bilgeläwne kertü uñayınnan borçıluın citkerde. Alay ğına da tügel, ul tağın da qıyuraq belderü yasadı - ägär dä Putin 2008-nçe yıldan soñ da prezident bulıp qalırğa teläp Rusiä konstitutsiäsen üzgärtä ikän, bu döres närsä bulmayaçaq, dide Quşma Ştatlarnıñ däwlät sekretare. Şulay itep, terrorğa qarşı köräş, dönyaküläm iminlek ölkäsendä xezmätätşlekne däwam itü xaqına Washington Rusiä citäkçelegen demokratiäne qısuı öçen tänqitläp tormas digän farazlar aqlanmadı. Üzeneñ qırıslığı belän tanılğan Rice bu mäs''äläne Rusiä tışqı eşlär ministrı Sergey Lavrov belän oçraşuında da, ä annan elegräk "Exo Moskvı" radiosındağı äñgämäsendä dä kütärde:

Audio, Condoleezza Rice

"Rusiäneñ demokratik kiläçäge turında andağı xalıqnıñ irekle fiker alışuı, qararlar qabul itä aluı öçen Rusiädä bäysez mäğlümat çaralarınıñ kübräk buluı zarur" dip belderä däwlät sekretare Rice. Quşma Ştatlarnı şulay uq Mäskäw Kremleneñ ildäge xakimiatne sovet zalimiate çorındağı tösle üzäkläşterüe, idarä dilbegälären üzendä genä totarğa omtıluı da borçıy. Condoleezza Rice monı da açıq itep belderde, ämma berük waqıtta ul Rusiädäge täräqqiatneñ üzençälekle buluın añlawın da äytte:

Audio, Condoleezza Rice

"Bez Rusiäneñ üz yulı belän baruın añlıybız häm bez monı xörmät itäbez. Bu uñaydan bez barı tik şunı ğına äytergä telibez ki, Rusiäneñ Quşma Ştatlar belän mönäsäbätlären tağın da tiränäytü häm monıñ Rusiäneñ üzenä tağın da zurraq fayda kiterüe öçen demokratik täräqqiatneñ buluı zarur. Ber prezidentta ğına şul xätle xakimiatne tuplap bulmıy. Häm bäysez media, mäğlümat çaraları buluı kiräk" dip añlata Rusiädä demokratiäneñ tirän tamır cäyü zaruriaten Condoleezza Rice. Şuşı borçuların ul ministr Lavrovqa da citkergän bulsa kiräk, ikeyaqlı söyläşülärdän soñ Rusiä tışqı eşlär ministrı moña işarä itep, "Rusiädä matbuğat ireklege yuq digän ğomumi borçularnı tikşeräse awır, bezgä tögäl misallar kiräk" dip belderde:

Audio, Sergey Lavrov

Rice moña, min biredä ayırım basmalar yäisä İnternet säxifäläre tügel, ä ğomumdäwlät telekanallarnıñ bäysezlegen istä totam dide. Ul üz borçuların Lavrovqa nindi teldä citkergäne mäğlüm tügel, ä menä "Exo Moskvı" radiosında Condoleezza Rice üzeneñ urısça belüen kürsätergä buldı. Anıñ süzlärenä qarağanda, iñ zur awırlıqnı urıs teleneñ kileşläre tudıra ikän. Amerikan däwlät sekretare Rice:

Audio, Condoleezza Rice

Kärim Kamal
XS
SM
MD
LG