Accessibility links

сишәмбе, 6 декабрь 2016, Казан вакыты 20:50

Neft şirkätläre qanunnan qaçıp qala almadı


Süz 2001-2002nçe yıllarda Baykonur aşa salım taşlamalarınnan faydalanu turında bara. Respublikanıñ neft şirkatläre Qazaxstan aşa salım taşlamalarınnan faydalanıp, 10 milliard sumnan artıq aqçalı bulğan ide. Ul qaytarıp birelde. Bu turıda Prezident Mortaza Räximov «Rosbalt» mäğlümat ağentlığına beldergän. Ul şulay uq qanunsız xosusıylaştırılğan zavodlar yazmışı mäxkämädä qaralıp, iyün ayına däwlät milke itep qaytarılaçağın da ireştergän. Başqortstanda iñ qaynar tema bulıp 16nçı aprel uzğan uram cıyını qala. Ul Başqortstannıñ berläşkän oppozitsiäneñ koordinatsiä şurasında da qaraldı häm ike dokument qabul itelde. Berençese -koordinatsiä şurasınıñ belderüe. Ul Rusiä Prezidentı, Xökümät citäkçese, Däwlät Duması, General prokuratura, İminlek xezmäte, Eçke eşlär ministrlıqlarına tapşırılaçaq. Anda uram cıyınında oppozitsiä wäkilläreneñ tuqmaluı äytelä. Zıyan kürüçelär arasında Rusiä Däwlät dumasınıñ ikençe çaqırılış deputatı, jurnalist Rinat Ğäbidullin da bar dielä. Uram cıyınında tuqmalğan 6 keşeneñ başqalanıñ Oqtyäbr rayonı eçke eşlär bülegenä möräcägät itüe äytelä. Çaranıñ oppozitsiä aldan planlaştırğan urında ütüe, militsiäneñ qanunsız törkem suğışçıları cıyıluğa yul quyuı, oppozitsiä citäkçeläre Bignov häm Dubovskiylarnıñ şul uq köngä iminlek xezmätenä soraw alırğa çaqırıluı, uram cıyını aldınnan oppozitsiäneñ maşinası häm tawış köçäytkeç cihazlarınıñ qulğa alınuı häm başqa bik küp misallar kiterelep, bolarnıñ artında xaqimiät toruı äytelä. Älege xällärne tikşerü öçen Xökümät komisssiäse oyıştırırğa çaqırıla. İkençe dokument Rusiä Prezidentına möräcägät. Anda Qarşılıq aksiäläre ütkärü turında qanun bozılu, oppozitsiägä xakimiät sanksiäse belän qanunsız törkem suğışçıların qarşı quyu, militsiäneñ moña küz yomuı häm başqa bik küp dälillär kiterelä. Prezidenttan älege faqtlarnı iğtibar üzägenä aluı sorala. Älege dokumentlarnı tapşıru öçen oppozitsiä wäkilläre 20nçe aprel Mäskäwgä oçtı. 16nçı aprel uzğan uram cıyını Başqortstan tatar cämägätçelek oyışmalarında da qaraldı häm anıñ qanunsız buluı bilgelände.

XS
SM
MD
LG