Accessibility links

якшәмбе, 4 декабрь 2016, Казан вакыты 17:20

Rusiä NATO belän yaña kileşü imzalıy, läkin Belarus mäsäläsendä Könbatış belän kileşmi


NATO häm Rusiä citäkçeläre pänceşämbedä ber-berseneñ üzlärendäge qorallı köçläre statusın bilgelägän kileşüne imzaladı. Litva başqalası Vilnüstä ütkän şuşı tantanada Rusiä yağınnan kileşügä qulın tışqı eşlär ministrı Sergey Lavrov, ä NATO öçen berlekneñ general'' sekretare Jaap de Hoop Scheffer quydı. Lavrov Vilnüs oçraşuın Quşma Ştatlar häm Yevropa Berlegeneñ Belarus''täge xakimiatne almaştıru öndämälärenä zarlanu öçen dä faydalandı.

Rusiä belän NATO arasında ber-berseneñ üzlärendäge qorallı köçläre statusın bilgelägän kileşüne imzalaw Tönyaq Atlantik saqlanu berlegeneñ ministrlar däräcäsendä tarixta berençe märtäbä elekke sovet respublikasında ütkärgän oçraşuında buldı. NATOnıñ elekke sovet berektäşläre xisabına kiñäyüenä inde şaqtıy waqıt ütsä dä, Mäskäwneñ moña, bigräk tä NATOnıñ üz çiklärenä kilep citüenä borçıluı äle haman da däwam itä. Jaap de Hoop Scheffer, oyışmanıñ general'' sekretare, Rusiä belän şuşı kileşüne imzalaw tantanasında, şul borçularnı kimetergä tırışıp Rusiäneñ NATO belän xezmättäşlegen yuğarı bäyälägän belderü yasadı:

Audio, Jaap de Hoop Scheffer

"NATO-Rusiä şurası konkret, ğämäli xezmättäşlek öçen ifrat ta faydalı ber cıyınğa äylände. Ämma anıñ säyäsi aralaşu alıp baru urınına äylänüe dä bik möhim, bez anda tulısınça kileşmäsäk tä fikerlärebezne açıqtan-açıq belderä alabız. Bu urtaq yanawlarğa urtaq qaraşlar buldıru yulların ezläw häm çın xezmättäşlek ruxında alıp barıla" di NATO general'' sekretare. Yaña ğına ireşelgän kileşü yaqlarğa urtaq xärbi künegülär ütkärü, NATOnıñ Rusiä aşa Äfğanstanğa ğäskärlär, cihazlar häm başqa kiräk-yaraqlar cibärü ölkäsendä zur yardäm bula ala. Anda şuşı ike tarafnıñ - Rusiä häm NATOnıñ - ber-bersendä üz ğäskärläre nindi xoquqi statusqa iä bulaçaq, şul qarala. Moñardan tış bu kileşü, NATOnıñ solıx saqlaw köçlärenä Rusiä xärbi bülekçälären cälep itü eşenä dä bulışaçaq dip farazlana. Yaqlarnıñ xezmättäşlek, urtaq fikergä kilü mäs''äläsenä basım yasawına qaramastan, Vilnüstä alay da ber qarşılıqlı problema kilep çıqtı. Rusiä ministrı Sergey Lavrov anda, Mäskäw Quşma Ştatlar häm Yevropa Berlegeneñ Belarus''täge xakimiatne almaştıruğa öndäwlären kire qağa dip belderde. Çärşämbedä amerikan däwlät sekretare Condoleezza Rice CNN telekanalına Belarus''ne "Yevropadağı soñğı diktatura" dip atağan ide:

Audio, Condoleezza Rice

"Min ayıruça, Yevropa üzägendä berdänber diktatura bulıp qalğan Belarus''tä nindi dä bulsa demokratik täräqqiat kürergä ömetlänäm" digän ide däwlät sekretare Rice. Atnakiç Vilnüstä ul yänä bu mäs''älägä qaytıp,

Audio, Condoleezza Rice

"Belarus'' xökümäte, ni eşlägäne xalıqara cämäğätçelek tarafınnan küzätelep baruın, ul ilneñ şıpırt qına teläsä närsä eşlänä torğan qara ber poçmaq bulmawın belergä tieş" dide. Ber atna elek Yevropa Berlege dä maxsus belderü yasap, anda üz çikläre buyında zalimiattän intekkän ilneñ yäşäwenä yul quya almawın äytkän ide. NATO illäre tışqı eşlär ministrlarınıñ Vilnüs oçraşuında şuşı oyışmağa Ukrainanıñ da quşıluı mäs''äläse qaraldı.

Kärim Kamal
XS
SM
MD
LG