Accessibility links

якшәмбе, 4 декабрь 2016, Казан вакыты 17:27

“Watan” partiäse möselmannarnı yaqlıy


22 aprel'dä Rusiä federatsiäse prokuraturası binası qarşında Möxämmät Minaçev citäkçelegendäge “Watan” partiäse piket ütkärde. Bu piket xäzerge waqıtta Rusiäneñ törle töbäklärendä, bigräk tä tatarlar yäşägän töbäklärdä möselmannarnı qulğa aluğa qarşı oyıştırılğan piket ide. Piketçıylar totqan plakatlarda “Prekratite gonenie na tatar, musulman”, “Svobodu slovo!” “Svobodu Mansuru Şangeerevu” , “İmperiä ne baluy s islamom” digän süzlär yazılğan ide. Şunısın da äytergä kiräk bu piket xaqında Mäskäwdäge küp törle islam oyışmalarına, mäçetlärgä xäbär itelgän bulsa da piketqa kilüçelär ber distägä dä tulmadı. Ä inde piketçılar kilep plakatların da açarğa ölgermädelär ike militsiä xezmätkäre alarnı Prokuratura binası yanınnan çitkäräk kitergä ügetli başladı. Şunnan soñ Minaçev röxsät käğäzen kürsätep, bez şuşı adres buyınça torabız, ber genä adım da çitkä kitmäyäçäkbez dide. İnde piketçılar urınnarınnan quzğalmağaç. Militsionerlar tiz arada tağı ber dokument kiterep, sez ekstremistlar bulmasağız, bu dokument astına qul quyığız dip ügetli başladılar. Läkin piketçılar qatı tordı. Militsiäneñ ber genä täqdimen dä ütämäde. Ber genä käğäzgä dä qul quymadı Xattä Tverskaya uprawasınnan kilgän, alarnı ikençe yaqqaraq borırğa tırışqan çinovnikka da röxsät käğäzen kürsätep, tegelärneñ üzlären borılıp kitärgä mäcbür ittelär. Äytkänemçä piketçılar totqan plakatlar arasında «Svobodu Mansuru Şangereewu» digäne dä bar ide. Ul keşe Rusiäneñ möftilär şurası räistäşe İsmail Şängäräyewnıñ bertuğan abıysı, bügenge köndä Asterxanda qulğa alınğan, törmädä utıra. Piketta İsmail xäzrät Şängäräev ta bar ide. Min annan, “Mäskäwdä ber yıl elek oyışqan “Xaq- Spravedlivost” digän xoquq yaqlawçı oyışma bar bit. Alar möselmannarnıñ mänfägaten qayğırtır öçen tözelgän oyışma bularaq tanıtqan ide üzlären. Nigä sez şul oyışmağa möräcäğät itmisez?”dip soradım. Ul mina “Min üzem ul oyışmanı oyıştıruçılarnıñ berse bulam. Läkin , minem abıyım belän şundıy xäl kilep çıqqaç ul oyışma citäkçese Kalandarov minnän çitkä borıldı. Ul oyışma xäzerge waqıtta barı tik xökümät qarşında yaxşı atlı bulıp qalırğa tırışqan oyışma. Alar berqayçan da möselmannarnı yaqlamayaçaqlar. Läkin bez yaña xoquq yaqlawçı yaña oyışma oyıştırdıq. Şuşı könnärdä genä Amerikada Washingtonda bulıp qayttıq. Anda Rusiädäge möselmannarnıñ xälläre turında söyläştek. Xoquq yaqlawçılar belän oçraştıq, -” dide.

Näzifä Kärimova “Azatlıq” radiosı, Mäskäw

XS
SM
MD
LG