Accessibility links

пәнҗешәмбе, 8 декабрь 2016, Казан вакыты 21:20

Vladimir Putin: "Rusiädä Yevropa qimmätlärenä nigezlängän demokratiä bulaçaq, ämma moña bez üz yulıbız belän baraçaqbız"


Bu atnanı Rusiä prezidentı Vladimir Putin üzeneñ yıllıq yullamasın bäyän itü belän başlap cibärde, xörmätle tıñlawçılar. Üze citäklägän Rusiäneñ eçke häm tışqı säyäsättäge maqsatların bilgeläp ul, alar berençe çiratta ildä demokratiäne, xoquqi wä säyäsi sistemanı nığıtudan ğibarät dip belderde.

Rusiä parlamentınıñ ike pulatı, xökümät äğzaları häm başqa yuğarı citäkçelär qarşında yasağan çığışında Putin demokratiäne niçek urnaştırunı Rusiä üze xäl itäçäk dip belderde. Anıñ süzlärençä, xakimiatneñ töp maqsatı - Yevropa qimmätlärenä nigezlängän irekle demokratik däwlät qoru, ämma moña ireşü yulların Rusiä üze bilgeliäçäk.

Audio, Vladimir Putin

"Demokratik qağidälärgä ireşüneñ xaqı xoquqi tärtip tä, bik awırğa töşkän totrıqlılıq ta, yäisä bez alıp barğan nıqlı iqtisadi kurs ta bula almıy. Moñarda min bez saylağan demokratik yulnıñ üzençälekle buluın küräm. Şuña kürä dä bez alğa taba üzebezneñ eçke şartlarnı iskä alıp baraçaqbız, ämma bu, älbättä, barı tik qanunğa, konstitutsiä nigezlärenä tayanıp qına alıp barılaçaq" dip belderä Rusiä prezidentı ildä demokratik üzgäreşlärne niçek alıp baraçağı turında. 50 minut çaması däwam itkän çığışında ul şulay uq, ildäge xoquqi wä säyäsi sistemanı tağın da näticäleräk itügä, alarnı konstitutsiädä çağılış tapqan töp xoquqi nigezlämälärgä yaqınaytuğa öndäde häm däwlät eşen üz kesälären genä qalınaytu öçen faydalanğan türälärne kisken tänqitläp çıqtı. Rusiä iqtisadın üsterü öçen ilgä çit il investitsiälären cälep itü kiräklegenä basım yasap Vladimir Putin berük waqıtta, üz aqçaların çittä totqan urıs eşmäkärlären dä tänqitläp aldı häm ul aqça kire Rusiä banklarındağı xisaplarğa qaytarılğan oçraqta aña 13 protsentlıq qına salım quyılırğa tieş dip belderde. Üz çığışında ul soñğı yıllarda Gruziä, Ukraina häm Qırğızstanda bulğan xakimiat üzgäreşlärenä tuqtalıp tormadı, ämma xökümät qanunğa sıymağan teläsä nindi kütäreleşne bastırudan qıyınsınıp tormayaçaq dip kisätte:

Audio, Vladimir Putin

"İldä demokratiäne ezlekle räweştä üsterü barı tik qanuni, xoquqi yullar aşa ğına mömkin. Milli, dini, başqa mänfäğätlärne xoquqi qısalardan çığıp qayğırtu tırışlıqları demokratiä nigezlärenä qarşı kilä, häm däwlät andıy omtılışlarğa qarşı qanuni, ämma qırıs çaralar küräçäk" dip kisätep quya Rusiä prezidentı. Üzeneñ 2008-nçe yılda prezident saylawlarında qatnaşu-qatnaşmawı xaqında Putin bu yulı berni äytmäsä dä, anıñ çığışında şaqtıy qızıq ber belderü yañğıradı. Ul, töbäklärdäge başqarma xakimiatneñ citäkçese itep andağı saylawlarda ciñep çıqqan partiä wäkilen quyıp bula dip belderde. Ser tügel, soñğı aralarda Putinneñ üzenä dä xakimiattä qalunıñ törle yulların täqdim itälär häm alar arasında anı Duma saylawlarında ciñgän partiädän xökümät başlığı itep bilgeläw täqdime dä bar.

Kärim Kamal
XS
SM
MD
LG