Accessibility links

шимбә, 3 декабрь 2016, Казан вакыты 01:29

Ğäläm ğämälläre: Soyuz qayttı, Discovery säfärgä äzerlänä


Düşämbegä qarşı töndä Rusiäneñ Soyuz karabı isän-imin ğälämnän äylänep qayttı. 2 yıl elek Amerikannarnıñ Columbia karabı qazağa oçrağannan soñ Soyuz''lar Xalıqara ğäläm stansiäsenä yök häm ğälämçelär taşuçı berdän ber çara bulıp tora ide. Yaqın arada Quşma Ştatlar shuttle oçuların yañartıp cibäräçägen belderde.

Rusiäneñ Ğaläm idaräsendä şuşı alqışlar Soyuz karabınıñ cirgä äylänep qaytası öleşe Qazaxstan dalasına kilep töşkäç yañğıradı. Ul cirgä Rusiäle Salihcan Şäripovnı, amerikan Leroy Chiaonı häm Yevropa Ğäläm idaräsennän italian Roberto Vittorinı alıp qayttı. Salihcan belän Leroy xalıqara ğäläm stansiäsendä uzğan yılnıñ üktäberennän birle eşlädelär, Roberto anda 8 kön elek mengän ide.

Atnalar buyı yawğan qarlı yañğır Qazaxstan dalasın sazlıqqa äyländerde, ğälämnän qaytunı şaqtıy awırayttı, 10 yärdäm boralağınıñ 3se genä cirgä utıra aldı. Alay da, İdarä başlığı Anatoli Perminov süzlärençä, barısı da yaxşı tämamlandı:

Audio (Anatoli Perminov)

"Hämmäse dä yaxşı ütte, barığıznı da qotlıym, barısı da isän-saw, inde ğäläm aparatınnan çıqtılar."

2003neñ Mayında computer xatası arqasında Soyuz bilgelängän urınnan 400 çaqırımğa taypılğan ide. Bu yulı Amerika Ğaläm İdaräse, NASA wäkile William Readdy Rusiä belgeçläreneñ eşenä maqtaw belderde:

Audio (William Readdy)

"Bezneñ urıs kollegalarıbız şundıy qatlawlı hawa şartlarında da eş itä belülären kürsätte."

Ul arada amerikannar üzläre 2 yıldan artıq tänäfestän soñ shuttle oçuların yañartıp cibärergä äzerlänä. 2003neñ fivralendä Columbia qazası näticäsendä 7 astronavt häläq bulğannan soñ shuttlelar tuqtatılıp torğan ide. Xäzer xalıqara stansiädä Rusiäle Sergei Krikalev belän amerikalı John Phillips eşläp qaldı. Alar anda 6 ay qalaçaq häm kiläse şuttlenı qabul itergä äzerlänä.

Discovery shuttle''ın cibärü Maynıñ ikençe yartısına bilgelängän ide. Uzğan atnada NASA citäkçeläre, tağın ber tikşerü kiräk dip, startnı 3 Yüngä küçerde.

Discovery Floridadağı Kennedy isemendäge Ğäläm Üzägendä, start urınına inde kiterelgän, şuşı atnada ul stansiägä cibärelese yök belän tutırılaçaq. Discovery missiäsen Eilen Collins citäkliäçäk. Bu anıñ ğälämgä 4nçe oçuı. Eilen xanım süzlärençä, 2 yıl buyı tikşerü ütkärgän belgeçlär aña karapnıñ tulısınça imin buluın äytkän. Xäyer, üze ul inde kiläçäk niätlär – ayğa, ä annarı xättä Marsqa oçu xyıalı belän yäşi:

Audio (Eilen Collins)

"Xäzer xalıqara satansiädä başqarılası eşlär -kiläçäkkä äzerlek. Ayğa, annarı Marsqa oçu öçen bezgä yaxşı belemle yegetlär häm qızlar kiräk bulaçaq."

Rusiäneñ Ğäläm idräse wäkile Valery Lındin süzlärençä, Discovery, ä annarı Atlantis shuttle''ları oçuların yañartıp cibärsä dä, Rusiäneñ Soyuz karapları xalıqara stansiägä yılına ike tapqır barıp-yörülären däwam itäçäk.

-Ali Gilmi
XS
SM
MD
LG