Accessibility links

дүшәмбе, 5 декабрь 2016, Казан вакыты 21:49

Älmirä İdiätullina: Cämğiätneñ äxlaqıy däräcäsen kütärergä kiräk


Vladimir Putinnıñ yıllıq yullaması törle dairä keşelärendä bertörle genä mönäsäbät tudırmadı. Qayber belgeçlär prezidentnıñ çığışında bernindi dä yaña fikerlär, yaña täqdimnär işetelmäde, maqsatlar küp bilgelängän, läkin alar arasında iñ aktuale bilgelänmägän, digän fiker yañğırattı. Qayberäwlär, şul isäptän, Rusiä Däwlät Dumasına Tatarstannan saylanğan Oleg Morozov, yullama ildä demokratiäneñ üseşe nindi yul belän barırğa tieş, digän sorawğa cawap birä dip sanıylar. Prezident, şulay uq, xökümätneñ eşlekle dairälär belän xezmättäşlege nindi bulırğa tieşlegen, xalıqnıñ tormışın niçek itep yaxşırtu xaqında da añlatmalar birde, dip belderde Oleg Morozov İntertat.ru säxifäsenä.

Ä menä möselman xatın-qızlar oyışması citäkçese Älmirä İdiätullinanıñ iğtibarın Vladimir Putinnıñ cämğiätneñ äxlaqıy däräcäsen kütärergä kiräklege turındağı süzläre cälep itkän. Ul bu xaqta Azatlıq radiosınıñ Qazan byurosına şaltıratıp, üz fikerläre belän urtaqlaştı.

Vladimir Putinnıñ çığışında nihayät cämğiätneñ äxlaqıy däräcäse tübän buluı äytelde. Ul, şulay uq, ruxi qimmätlär dä istä totılırğa tieş, ğädellek, ädäplelek, tuğrılıq bulırğa tieş, dip äytte. Bu bit inde bezneñ islam dineneñ qimmätläreneñ qaytaru zarurlığın äytü tügelme soñ bu? Rusiä prezidentınıñ äxlaqnı qaytaru fikeren min dulqınlanu belän tıñladım häm millättäşlärebez, möselmannar öçen, Tatarstanıbız öçen şatlıqlı ber ğorurlıq xise dä toydım. Çönki bez respublikada äxlaqıy tärbiä turında berqayçan da istän çığarmıybız

Bu möselman xatın-qızlar oyışması citäkçese Älmirä İdiätullinanıñ Rusiä prezidentınıñ yıllıq yullaması turında fikerläre ide.

Gölnaz İlgizär

XS
SM
MD
LG