Accessibility links

шимбә, 10 декабрь 2016, Казан вакыты 19:42

Süriä ğäskärlärennän arınğan Livanda parlament saylawların başlaw kiñäşläşüläre bara


Sişämbedä Livannan Süriä ğäskärläre çığıp kitü belän töp iğtibar anda xäzer may ayına bilgelängän saylawlarğa yünälde. Çärşämbedä anıñ tögäl könen bilgeläw xaqında kiñäşläşülär alıp barıldı. İñ möhim mäs''älä bulıp xäzer tawış birü aldınnan häm annan soñ 80-nçe yıllarda watandaşlar suğışı kiçergän şuşı ildä totrıqlılıqnı saqlap qalu tora.

Çärşämbegä qarşı töndä Süriäneñ Berläşkän Millätlär Oyışmasındağı daimi wäkile Räysäl Miqdad, üz ileneñ İminlek Şurası qabul itkän 1559-nçı qararnı ütäp Livan cirendäge bar ğäskärlären dä çığaruın belderde:

Audio, Räysäl Miqdad

"Min äle menä xäzer genä Süriä Ğäräp cömhüriateneñ tışqı eşlär ministrı ğälicanäpläre İminlek Şurası häm Berläşkän Millätlär general'' sekretare ğalicanäplärenä yazğan xatın tapşırdım, anda Süriä üz ğäskärläreneñ, iminlek xezmätkärläreneñ häm bar mölkäten Livannan tulısınça çığaruın raslıy" dip belderde Süriäneñ BMO-dağı daimi wäkile New Yorkta. Çärşämbedä Livanğa Kofi Annannıñ ğäskärlär çığarunı raslaw öçen cibärgän maxsus törkeme kilde. Şulay itep şuşı ilneñ tarixında xäzer yaña çor başlanırğa tora, häm Livannı alda ni kötäçägen berkem dä ışandırıp äytä almıy. Üzeneñ İminlek Şurasına yullağan soñğı xatında Kofi Annan Livandağı küçeş çorınıñ niçek baruı xaqında borçıluın beldergän ide. May ayında anda parlament saylawları uzarğa tieş, xalıqara cämäğätçelek şul çaranı ilneñ möstäqillegen, berdämlegen häm säyäsi bäysezlegen kürsätäçäk ber sınaw itep kürä. Livandağı saylawlar berniçä öleşkä bülenep häm berniçä atnağa suzılıp ütä. Çärşämbedä tawış birüne qayçan başlaw turında fiker alışular alıp barıldı. Parlamenttağı säyäsi köçlär monı ilneñ premyer-ministr Näcip Mikatineñ yaña xökümäten bilgeläw mäs''äläsenä bäylärgä cıyınaçağın äytte. Livan parlamentı citäkçese Näbi Berri, ul Süriä tarafdarı sanala, üz säyäsi berläşmäseneñ Mikati xökümäten, saylawlarnı 29-nçı mayda başlaw bäräbärenä yaqlayaçağın xäbär itte:

Audio, Näbi Berri

"Azatlıq wä täräqqiat berläşmäse ildä saylawlar ütkärüne yaqlıy, monıñ köne 29-nçı may. Parlament citäkçese başqa täqdimnärne qabul itmiäçäk. Bezneñ berläşmä täqdim itelgän Näcip Mikati xökümäten, tawış birüneñ 29-ında başlanuı belän kileşü nigezendä yaqlayaçaq" di Livan parlamentı räise Berri. Anıñ şuşı qararı belän ildäge başqa öç möhim säyäsi köç - şığıylarnıñ Hizbulla xäräkäte, Wälit Cumblattnıñ druzları häm elekke premyer, höcümdä üterelgän märxüm Rafiq Xariri tarafdarları da kileşä dip xäbär itelä. Älegä qädär ildä Süriä ğäskärläreneñ toruı, şul kürşe ilneñ Livandağı saylawlarğa üzenä niçek kiräk şulay tä''sir itü qurqınıçın tudıra digän qurqular bar ide. İnde telgä alınğan Rafiq Xariri Dimäşqtäge xakimiatne Livan eşlärenä tıqşınuda ğäyepläp tä çıqtı. Fivral''neñ 14-endä isä ul, üzenä yasalğan höcümdä hälak buldı. Şunnan birle Süriägä xalıqara däräcädä Livandağı ğäskärlären çığaru basımı yasalıp kilde häm bu sişämbedä alarnıñ ildän tulısınça kitüe belän näticälände. Süriä ğäskärläre Livanğa, ilneñ säyäsi köçläre üteneçe belän andağı watandaşlar suğışın tuqtatu maqsatında kertelgän ide.

Kärim Kamal
XS
SM
MD
LG