Accessibility links

шимбә, 3 декабрь 2016, Казан вакыты 16:51

www.yeshlek.ru «Windows»qa başqort telen östärgä täqdim itäme?


«Yäşlek»teñ «İnternet güzäle-2005». «Yäşlek» digän başqort yäşlär gäziteneñ internet säxifäse soñğı waqıtta iğtibarnı cälep itä başladı. Küptän tügel, bu gäzit, başqort qızları arasında internet çibärlek bäygesen ütkärde. Tögälräk äytkändä, internet bäyge, «Hılıuqay -2005» respublika bäygeseneñ ber yünäleşe genä bulğan. Alay da, käğäzdäge «Yäşlek» yazğança, bäygedä ciñüçene saylaw ciñel bulmağan, çönki qızlarnıñ barısı da bik matur häm uñğan bulğan. «İnternet güzäle-2005» digän isemgä layıq qıznı «Yäşlek» internet säxifäse uquçıları saylanğan ikän. Ciñüçe Alina İmangolovağa 12 qız arasınnan iñ küp tawış birelgän häm ul «Yäşlek»teñ «İnternet güzäle-2005», dip iğlan itelde. Qızğanıç, www.yeshlek.ru saytında bu bäyge turında mäğlümatnı, internet tawış birü näticälären tabıp bulmadı. Anıñ qarawı, forumda qazına torğaç, http://konkurs.yeshlek.ru/categories.php?cat_id=19 saytına çığu yulı açıldı. Läkin anda da bäygeneñ yomğaqları tabılmadı.

Alayda, «Yäşlek»neñ internet säxifäse yäşlärneñ iğtibarın nıq cälep itä. Biredäge forum da gel bäxäslär bara, qızıqlı fikerlär äytelä. Säxifä başqa internet säxifälärgä çığu yulların üzenä tuplağan. Başqort internet säxifälären ber çeltärgä totaştıruçı sayt wazifasın da üti ul.

Yañalıqlar bülege iğtibarnı üzenä yünältä. Anda, Tatarstan «Microsoft» kompaniäse belän xezmättäşlek alıp bara, räsmi röxsätle programmalarına tatar telen quyarğa cıyına dip äytelä. Bu xaqta bez «Tatnet» tapşıruında da söylägän ide. İnde şuşı www.yäşlek.ru saytında bu xäbärgä reaksiä basılıp çıqqan. «Yäşlek» gäzitendä şuşı xäbärne kürgän beräw, «Windows»qa başqort telen kertergä kiräk, dip täqdim itä. Başqortlarnı «Windows» aşa tatarlaştırunı buldırmasqa!, digän belderülär dä yasıy ul. Bu replikanıñ avtorı, Başqortostan xakimiätlärenä «Microsoft» eşenä aqçalata quşılırğa häm bu eşne tatar-başqort proyektı itep atarğa täqdim itä. Hiç bulmasa, Başqortstanğa üzenä Microsoft belän kileşülär tözergä, bula di ul. «Windows» aşa tatarlaştıru mömkinlege qurqıta bu forumçını. Bu fikerlärne sez www.yeshlek.ru saytında taba alasız.



Bikä Timerova.

XS
SM
MD
LG