Accessibility links

якшәмбе, 11 декабрь 2016, Казан вакыты 16:52

Tatarstanda yaña-iske xökümät raslandı


Tatarstan Däwlät Şurasınıñ utırışı aldınnan başta Mädäniät, fän, mäğärif häm milli mäs'älälär buyınça komitetı utırışı bulıp uzdı. Anda Zilä Wälievanı Premyer-ministrınıñ urınbasarı - TR mädäniät ministrı itep bilgeläwne xuplandı. Şulay itep, soñğı könnärdä iñ qızıqlı mä’sälälärneñ berse bulıp torğan mä’sälä xäl itelde. Zilä Wälieva citäkçelegendä nindi ministrlıq bulaçaq, mädäniät ministrlığımı yä bulmasa mädäniät häm mäğlümatı kommunikatsiälär ministrlığımı oyıştıru turında bäxäs comğa könne qabınıp kitkän ide. Xökümätkä başqa nämzätlär mondıy zur qızıqsınu tudırmadılar. Çönki, nämzätlär üzläre elek bilägän urınnarına täqdim itelgän ide. Barı tik tağın ber nämzät – Boris Pavlov qına vitse-premyerlıq eşendä yaña keşe buldı. Ä Zilä Wälieva isä älegä qädär vitse-premyer eşen başqarğan ide, xäzer dä şul uq däräcädä qaldı. Moña östäp Mädäniät ministrı portfelen dä aldı.

İskä töşerep ütäbez,pänceşämbedä Däwlät Sovetı komitetlarınıñ urtaq utırışında parlamentarilar Zilä Wälievanı Premyer-ministrınıñ urınbasarı - TR mädäniät häm massaküläm kommunikatsiälär ministrı wäqälätenä bilgeläw mä’säläsen kön tärtibennän töşerep qaldırdılar, çönki mädäniät ministrlığı belän «Tatmedia»nı quşu yuridik yaqtan döres formalaştıruda sorawlar tudırğan.

Däwlät Şurasınıñ Mädäniät komitetı utırışında comğa kön säğät tuğızda Premyer-ministrı wazifaların başqaruçı Röstäm Miñlexanov qatnaştı. Ul qabul itelgän qararğa añlatma birep, ul Mädäniät ministrlığı häm massaküläm kommunikatsiä çaraların koordinatsiäläw eşendä struktur üzgäreşlärneñ törle variantları qaraluın bilgeläp ütte. "Bügen massaküläm mäğlümat çaraları belän maxsus orğan - "Tatmedia" agentlığı şöğellänä. Bazar üzgärtep qorularınıñ älege etabında däwlät idäräsendä üzgäreşlär kiräkmi. Zilä Wälieva vitse-premyer wäqälätendä dä wazifalarnı bülü näticäsendä ictimaği oyışma, media-xezmätlär eşen koordinatsiäläyäçäk." dip añlattı Röstäm Miñlexanov.TR mädäniät ministrı wazifasına respublikanıñ ğına tügel, ä böten dönya tatarlarınıñ mädäniät mä’säläläre da kerüen iskä töşerde.

Ä Däwlät Şurasınıñ comğadağı sessiäse kön tärtibenä 58 mä’sälä kertelgän ide. Alar arasında respublika prokurorı protest birgän qanunnarnı qaru, töbäk parlamentları täqdim itkän qanun proyektların tikşerü, häm Tatarstan parlamentınıñ mönäsäbäten belderü, Tatarstan ictimaği palatası turında qanunnı berençe uqılışta qaru kebek mäsällär bar ide. Älbättä, töp säyäsi mä’sälä, ul parlament tarafınnan Respublika Xökümäteneñ berençe citäkçelären raslaw. Sessiädä, prezident täqdim itkän Xökümät citäkçeläre raslandı. Şulay itep, Röstäm Miñlexanov yañadan respublika ministrlar kabinetı räise itep saylandı. Anı yaqlap 82 deputat tawış birde, 6 deputat qarşı çıqtı.

Parlamentarilar prezident Mintimer Şäymievneñ Rawil Moratovnı häm Boris Pavlovnı- Premyer-ministrınıñ berençe urınbasarı - TR iqtisat häm sänäğät ministrı, Vladimir Şvetsovnı Premyer-ministrınıñ urınbasarı - TR transport häm yul xucalığı ministrı, Marat Äxmätovnı TR Premyer-ministrınıñ urınbasarı - awıl xucalığı häm azıq-tölek ministrı, Zilä Wälievanı - Premyer-ministrınıñ urınbasarı - TR mädäniät ministrı wäqälätenä bilgeläw täqdime belän kileşep, tawış birdelär.

Xäzer Tatarstan premyer-ministrınıñ ike berençe urınbasarı päyda buldı. Monnan tış, biş vitse-premyer da ministrlıq portfelläre iäse buldı. Qızığı şunda, premyernıñ ike berençe urınbasarı da iqtisat mä’säläläre buyınça belgeçlär. Monnan tış Tatarstan prezidentı Xökümät başlığı urınbasarları xäl itäçäk mä’sälälärne bilgeläde. Şulay itep, Tatarstanda yaña da, ber ük waqıtta öleşçä iske dä bulğan Xökümätneñ berençe citäkçeläre parlament tarafınnan raslandı. Başqa ministrlıqlarğa kilgändä, alarnıñ citäkçelären prezident üzeneñ Färmanı belän genä dä bilgeli alaçaq, Däwlät Şurasınnan alarnı raslaw kiräk tügel.

Şulay da, sessiädä ministrlıqlarğa qayber üzgäreşlär dä kertelde. Yäşlär häm sport ministrlığı, Däwlät Şurası qararı belän, xäzer turizm öçen dä cawap biräçäk.

Parlamentarilar, şulay uq İctimaği palata turındağı qanunnı da berençe uqılışta qaradılar.

Räfis Cämdixan

XS
SM
MD
LG