Accessibility links

пәнҗешәмбе, 8 декабрь 2016, Казан вакыты 14:53

Bağdadta şartlawlarda kimendä 20 keşe hälak buldı


Başqalanıñ üzendä häm çitendä ber yulı yañğrağan berniçä şartlaw näticäsendä bügen kimendä 20 keşe hälak buldı, distälägän keşe yaralandı. İssam Ali isemle Bağdad keşese, ber şartlawnı menä bolay sürätläp birde: "Polisiä maşinanı tikşerä ide, bez tübäsenä utırğan idek, häm ber waqıt maşina şartladı, tirä yaqtağı maşinalarğa da ziyan kilde. Yul buş ide," dide şaxit. Eçke eşlär ministrlığı belderüençä, älege höcümnärneñ xädäfe – Ğiraq iminlek köçläre bulğan. Soñıraq internetta basılğan belderüdä, inde küptän ezlängän Yordanlı suğışçı Abu Musab al-Zarqawinıñ Ğiraqtağı amerikan köçlärenä höcümnär däwam itäçäge turındağı süzlär bulğan dip xäbär itelä. Ämma älege belderüneñ çın bulu-bulmawı bäysez çığanaqlardan raslanmağan. Kiçä genä Ğiraqta 50 yıldan artıq waqıttan soñ berençe tapqır demokratik xökümät tözelüe turında iğlan itelgän ide. Ğiraqnıñ kürşe däwlätläre wäkilläre – İran, Yordan, Kuwait, Süriä, Söğüd Ğäräpstan häm Törkiä, şulay uq Mısır häm Bahrain diplomatları Ğiraqnıñ säyäsi tärräqiäte turında söyläşer öçen İstanbulda cıyıldı. İrtägä anda şuşı illärneñ tışqı eşlär ministrları oçraşuı ütäçäk. Cıyında Ğiraq tışqı eşlär ministrı Hoşyar Zebari da qatnaşaçaq.

XS
SM
MD
LG