Accessibility links

җомга, 2 декабрь 2016, Казан вакыты 21:11

Taiwannıñ oppozitsiä citäkçese Qıtayğa qarşılıqlı säfären däwam itä


60 yıl elek kommunistlarğa ciñelep Qıtaydan Taiwanğa kitkän millätçelär arasında Lien Çan ğailäse dä bulğan. Xäzer ul Taiwannıñ Kuomintang, yağni şul millätçelär partiäsen citäkli.

Qıtaynıñ Tönyağında, Sian qalasında tuğan Lien 60 yıl uzğannan soñ bügen berençe tapqır tuğan cirenä kilde. Hawa alanında anı üze uqığan mäktäp uquçıları sälämläde. Lien Çan üzeneñ balaçağın bolay iskä aldı:

Audio (Lien Çan)

"Sian minem tuğan häm balaçağım ütkän cirem. Annan kitkändä miña 8 yäş ide. Suğış, yä başqa şartlar buluğa qaramastan, balaçaq bareber iñ güzäl çaq bulıp istä qala."

Soñğı 60 yıl buyına Taiwan möstäqil yäşäsä dä, Qıtay äle dä anı üzeneñ ber öleşe dip sanıy, kiräk bulsa köç qullanu belän yanıy.

Lien Çan Kuomintang partiäseneñ Qıtayğa kilgän berençe citäkçese buldı. Comğa könne ul Qıtay prezidentı, komunistlar partiäse citäkçese Hu Jintao belän oçraştı. Şulay itep ike partiä citäkçese soñğı 60 yılda berençe tapqır oçraştı. Citäkçeneñ ikese dä Taiwan boğazı aşa duslıq küpere suzu kiräklegen äytte. Şul uq waqıtta bu oçraşuğa tänqit belän qarauçılar da bar. Taiwannıñ bäysezlek taraflı xökümäte bu oçraşudan soñ mönäsäbätlärneñ yaxşırasına ışanmıy.

Taiwannıñ Qıtay säyäsäte öçen cawaplı räsmie Joseph Wu bolay dide:

Audio (Joseph Wu)

"Millätçe häm komunistlar partiäse citäkçeläre oçraşuına kilgändä, ul qabat şunı kürsätte: Qıtaynıñ boğaz ara mönäsäbätlärne yaxşırtırğa niäte yuq. Taiwan xökümäte moña ükeneç belderä."

Ul arada, Yevropa Berlege bu oçraşunı uñay täräqqiät dip bäyäläde. Quşma Ştatlar, solıx söyläşülären däwam itergä kiräk, läkin anda Taiwan prezidentı Çen Şui-bian da qatnaşsın digän teläk belderde. Näq menä anıñ partiäse bäysezlek taläp itä. Aq Yort süzçese Scott McClennan:

Audio (Scott McClennan)

"Bezneñçä, xäzer Qıtay citäkçeläre häm Taiwan xökümäte wäkilläre arasında oçraşu kiräk. Räsmi Pekin, Taiwan prezidentı Çen häm xökümätneñ başqa äğzaları belän söyläşügä taba baruın däwam iter digän ömeten belderde Aq Yort wäkile."

Lien Çan üzeneñ Qıtay säfären Şanxayda tämamlıy.

-Ali Gilmi
XS
SM
MD
LG