Accessibility links

шимбә, 10 декабрь 2016, Казан вакыты 15:55

Dönyanıñ törle illärendä 1 May çaraları ütte


Yäkşämbedä dönyanıñ törle illärendä 1 May könenä bağışlanğan çaralar ütte. Mäskäwdä ütkän namayışta 20 meñläp keşe qatnaştı. Alar minimal xezmät xaqın yäşäw däräcäsenä kütärergä taläp itte. Kommunistlar häm oppozitsiädäge başqa partiälär uramğa Lenin häm Stalin sürätlären, Sovet bayraqların kütärep çıqtı. Komunistlar citäkçese Genadi Züganov il citäkçelärenä kisken täniqt belderde, töp säyäsi häm iqtisadi mäsälälärgä referendum ütkärergä çaqırdı. Mäskäwneñ Teatr mäydanında, sul köçlär cıyılğan urında, Natsional-bolşeviklar partiäseneñ ike aktivistı totqarlanğan. İtar-Tass xäbärenä qarağanda, alar prezident Putinnıñ süräten yırtıp taşlağan häm militsiä qamawın ütergä tırışqan. Partiäneñ meñgä yaqın tarafdarı Baş prokuratura binası yanına kilep iptäşlären azat itergä taläp itte.

1 May çaraları bügen dönyanıñ başqa illärendä dä ütte. Germaniäneñ törle şähärlärendä hönärçelär berlege ütkärgän çarada 500 meñläp keşe qatnaşqan. Uzğan töndä Berlinnıñ Friedrichshein bistäsendä rok-konserttan qaytıp baruçı yäşlär belän politsiä arasında çualışlar bulğan. 65 keşe totqarlanğan dielä. İstanbulda, demonstratsiä tıyılğan buluğa qaramastan, keşelär uramğa çıqqan. Törek politsiäse 47 keşene totqarlağan. 1 May çaraları şulay uq Qıtay, Kuba, Bangladeşta ütä. Ber keçkenä demonstartsiä Bağdadta da bulğan. Ğiraq suğışına häm atom qoralına qarşı çaralar bügen New Yorkta kötelä.

XS
SM
MD
LG