Accessibility links

якшәмбе, 11 декабрь 2016, Казан вакыты 15:03

Moñlılar qartaymıy


Berençe may könne Qazanda bik üzençälekle ber mädäni waqiğa buldı. Demonstratsiädä yäki baqçada yörep qaytqan cämäğätçelek wäkilläre televizor aldında häm rizıqlı öställär artında yal itäse urınğa ber qart cırçınıñ tuğan könenä cıyıldı. Usman Älmievqa 90yäş tuluğa bağışlanğan kiçägä kilüçelär sanı Tinçurin teatrı binasına sıyarlıq tügel ide. Başqa waqıtta şul uq zalğa konsertqa kilegez dip ügetläwçe reklama köne-töne yañğırasa da, tamaşaçılar yartı zallı ğına cıyılğan çaqlar buldı. Ä bu yulı iñ yuğarı galerkalar da tulı buldı. Monıñ sere bik ğadi. Usman Älmiev opera säxnäsendä dä, estrada konsertlarında da çın professional' milli cırçı bularaq 70yıldan artığraq çığışlar yasıy. Böyek İlham Şakirov häm başqa ataqlı cırçılar anıñ şäkertläre dip sanala. Kemnärder inde ällä qayçan gür quyınında, başqaları cırlıy almıy, xätta fatirınnan çıqmıyça dönyanı täräzädän küzätüçe aqsaqallar häm aq äbilär bar. Ä menä Usman Älmiev säxnägä çığıp, üzeneñ yäş häm çın professional' tawışı belän cırlıy başlağaç, şaqqatasıñ. Dönyağa tanılğan Sergey Leneşev, Kozlovskiylardan hiç tä qalışmıy ul. 3-4säğät buyı tamaşaçılar Bravo! Bis!, dip qul çaptılar. Cırçını qotlarğa dip kilgän ataqlı sänğät'kärlär İlham Şakirov, Färidä Qudaşevadan başlap, äle yaña ğına säxnägä çıqqan yeget-qızlar tere klassikka soqlanuların belderdelär. Qayberäwlär fikerençä, 90 yäşlek Usman Älmiev äle dä yañğırawıqlı isemle danlı säxnä yoldızlarınnan şäbräk cırlıy.
Bu ğacäep şäxesneñ tormışı häm icatı turında xäzerge buın belmi diärlek. Xätta Usman Älmiewneñ lazer tälinkäse, audio kassetası da çıqqanı yuq. Şuña kürä anıñ tärcemäi xälenä iğtibar itik. Usman Ğafiät ulı Älmiev 1915yılda Yäşel Üzän rayonı Aqyeget awılında tuğan. Öç yäştän änisez, altı yäştän ätisez qalğan, balalar yortında tärbiälängän. Qazan teatr texnikumında belem alğannan soñ, 1931yılda uq Tatar däwlät akademiä teatrında eşli başlıy. Mäskäwdä P.İ.Çaykovskiy isemendäge Däwlät konservatoriäsendä tatar opera studiäsendä belem ala. Opera häm balet teatrında ul Cäwdät Fäyzineñ “Başmağım” muzıkal' komediäsendä Ğalimcan, Näcip Cihanovnıñ “Altınçäç” operasında Urmay häm Cik, S.Säydäşneñ “Naemşçik” muzıkal' dramasında Batırcan häm başqa qabatlanmas obrazları belän tamaşaçı mäxäbbäten yaulıy. 1944, 1950, 1958yıllarda ildä ütkärelgän Bötenrusiä cırçılar konkurslarında qatnaşıp, lawreat isemen yaulıy. G.Tuqay isemendäge filarmoniäse cırçısı bularaq, üzeneñ konsert brigadası belän respublikanıñ häm ilneñ şähärlärendä çığışlar yasıy. Soñğı yıllarda säxnä veterannarı şurasın citäkläp, cämäğät eşe belän şöğellänergä, üzeneñ istäleklären, memuarların tuplağan kitabı östendä eşlärgä dä waqıt taba.
Berençe mayda ike säğät yarımğa planlaştırılğan konsert kiçke säğät altıdan başlap unberençe yartıda ğına tämamlandı. Çönki här kilgän keşe bik täfsilläp tirän fikerlär äytergä teläde. Äle şunnan soñ da 91nçe yäşkä ayaq basqan Usman Älmiev akterlar yortında oyıştırılğan yubiley tabınına kitte. Häm anda da cırlap alğan dilär anı. Qızğanıç anıñ lazer tälinkäsen yäki kassetasın tabıp bulmadı. Ber cayın tabıp sezgä dä bu yañğırawıqlı tawışnı işettererbez äle.
Al'bina Zäynulla, Qazan.

XS
SM
MD
LG