Accessibility links

шимбә, 10 декабрь 2016, Казан вакыты 09:57

Niçek tatar bulıp qalırğa?


Bügenge zamannıñ mäğlümat alu, mäğlümat birü çaraları şul qädär küp millätle häm küp telle, häm alarnı saylap alğanda, här xalıqnıñ küñelendä tuğan şikelle, tatarlarda da iñ berençe çiratta:“Niçek tatar bulıp qalırğa soñ ?-digän soraw tua. Häm bu sorawğa cawapnı Tol'yattida yäşägän balalar da ezli ikän. Bu turıda bezgä Tol'yattidän kilgän “Olimpiä” progimnaziäseneñ citäkçese Läysän Äxmädieva söyläde.

“Rezida apa Wälievanıñ şigerlären uqi-uqi, tıñlıy-tıñlıy , cırların cırlıy-cırlıy bezneñ balalar tatar bulıp yäşäp kilälär.”dide ul. Läysän Äxmädievanı bez K.Tinçurin teatrında şağirä Rezidä Wälievanıñ yubileena bağışlanğan kiçädä oçrattıq. Rezida Wälievanıñ icat kiçäsenä qazanlılardan başqa, bik küp cirlärdän qunaqlar kilgän ide. Anı tuğan yağı Başqortstannıñ Salawat rayonınnan, Qiğı, İglin rayonnarınnan häm Ufadan - Başqortstan tatar xatın- qızları oyışmasınnan da qotladılar. Rezidä Wälieva üze kiçädä kilgän qunaqlarğa räxmätlären belderep, “Ätiemä” häm “Ulıma” digän şiğerlären uqıdı.

Ğomereñdä ägär awır xälgä qalsañ,
Yul tabalmıy aptırasañ, arıp talsañ,

Yöz çöersä yaqınnarıñ, söygän yarıñ,
İseñä töşer bu dönyada
Anañ barın...
.

Şağirä Rezida Wälievanı qotlarğa TR Yazuçılar berlegennän, mädäniät ministrlığınnnan , respublikanıñ törle rayonnarınnan, xätta Mäskäwdän kilüläre dä älläni ğäcäp kürenmi.Ä menä bik küp kitaplar avtorı häm populyar şağiräne qotlarğa, urıslar yäşägän ölkädäge yäşlär şähäre, 30 meñ tatar yäşägän Tol'yattidän ädäbiät, şiğriät söyüçe dusları da kilgännär ide. İñ xikmätlese şul – mondağı yäşlär üzläreneñ tatar balaları ikännären tanıp, ğorurlanıp yäşilär ikän. Alar äle 14 mayda Qazanğa kilep konsert belän qazanlılarnı şaqqattırırğa äzerlänälär ikän. Ğ.Kamal teatrında Samara şähäreneñ “Yalqınlı yäşlek”ansamble belän berlektä Olimpiä” mäktäbe balaları üzläreneñ “Söyembikä ” moda teatrı häm “İdel Bolğarstanı” dip atalğan tarixi küreneş kürsätäçäklär”-dide Olimpiä mäktäbe citäkçese Läysän Äxmädieva. Menä şundıy xıyallar belän yäşilär Tol'yatti balaları. Alar häm tağı bik küplär Qazanğa milli rux, sänğät belän tanışırğa kilsälär, qaywaqıtta alar şähärdä tatar ruxı citmäwenä iğtibar itälär. Bu yulı isä alarnıñ yulları uñdı. Alar milli ruxlı şağirä Rezidä Wälievanıñ yubiley kiçäsendä buldılar. 300 dan artıq şiğerenä cır yazılğan Rezidä Wälieva icatı yäş buın tatarlarınıñ milli ruxın uyattı. Mälikä Basıyr , Qazan.

XS
SM
MD
LG