Bıyıl Tatarstanda yazğı taşu köçle bulaçağı turında Ğädättän tış xällär ministrlığı aldan uq xäbär itkän ide. Yılğalarğa yaqın torğan awıllarda su basuğa äzerlänü berniçä ay aldan uq başlandı. Yäşel Üzän, Qaybıç, Apas rayonnarı xucalıqlarında yıl sayın diärlek su taşu küzätelä. Şuña Ğädättän tış xällär ministrlığı älege rayonnarğa ayıruça iğtibarnı arttırdı. Rayon xakimiätläre belän Ğädättän tış xällär ministrlığı bälä-qaza kilmäsen öçen kileşep eşlädelär.
Taşqın respublikada 7 aprel' tirälärendä Zöya yılğası yanında başlandı. Şul könnän respublikada täwlek buyı Ğädättän tış xällär ministrlığınıñ 6 törkeme kizü tordı. Yılğalarda boznı şartlatuğa iğtibar yunältelde. Anıñ buyınça respublikada 21 operatsiä uzdı häm 12 rayonda boz şartlatıldı. Monıñ öçen barlığı 700 kilo trotil qullanılğan. Respublikanıñ Ğädättän tış xällär ministrlığı bu başqarılğan xezmätlär näticäsendä küp kenä xucalıqlar su basudan zıyan kürmi qaldılar dip assızıqlıy. Şuña da qaramastan Tatarstanda 337 işek aldı häm baqçanı su basqan. Qurqınıç xäl tua qalsa, keşelärne ikençe urınğa küçeräçäkläre turında beldergän ide TR Ğädättän tış xällär ministrlığı. Çınnan da 3 toraq punkttan 56 keşene küçerep torırğa turı kilgän. Qayber xucalıqlarda su taşu näticäsendä keşelär köymälärdä yörergä mäcbür bulğannar. Apas rayonı awıllarındağı bälä-qazalar turında, yazğı taşuğa qarşı oyıştırılğan maxsus komissiäneñ wäkile Rişat Camaliev
Däwläki-Däweş awılında yulnıñ ber öleşen su basu näticäsendä zur zıyan kilde. Däweş awılında elektr bağanası awıp elemtä özelde. Çärşämbe könne Apas rayonına “Rosgosstrax- Tatarstan” iminiät cämğiäte tikşerüçeläre zıyannıñ külämen bilgeläw öçen kilgän.
Äytergä kiräk, “Rosgosstrax- Tatarstan” iminiät cämgyäteneñ rayonnarındağı büleklärenä su taşudan zıyan kürüçelär şaqtıy möräcäğät itkän. Barlığı respublika buyınça 900 ğariza kergän. “Rosgosstrax-Tatarstan” oyışması xäbär itüençä, zıyan kürüçelärgä barlığı 2 million 300 meñ sum tiräse aqça tülänäçäk. Bua, Qaybıç, Quqmara, Yäşel Üzän awılları xucalıqlarında yäşelçä baqçaları, işek alları zur zıyan kürgän. Bügen alarnıñ külämen açıqlaw bara.
Xäzerge waqıtta su taşunıñ berençe öleşe tämamlandı. Ğädättän tış xällär ministrı Valeriy Vlasov ikençe etapqa da äzerlek berençesennän kim bulmasqa tieş dip belderä.
Landış Xarrasova
