Accessibility links

шимбә, 3 декабрь 2016, Казан вакыты 12:44

Eçke eşlär ministrı Äsxät Säfärov: terrorğa qarşı toru öçen, ay sayın, öyränülär bulaçaq


Eçke eşlär ministrı Äsxät Säfärov, «Tatar-inform» ağenlığı ütkärgän on-line söyläşüdä, berniçä möhim belderü yasadı. Anıñ äytüençä, 1000 yıllıq bäyrämenä qädär, ay sayın militsiä öyränüläre uzaçaq.



Tärtip saqlaw oyışmalarınıñ şähärdä niçek itep öyränülär uzdıruın küplär xäterli. Mömkin terrorçılarnıñ kilüe häm mömkin şartlaw qurqınıçınnan saqlanu çarası, 27 aprel könne ütkän ide. Şähär üzäge yabıldı, cämäğät transportı äylängeç yullardan cibärelde. Militsiä xezmätkärläre bäyräm çaraların ütkärgändä, üzlären niçek totuların kürsätergä tieş ide. Soñınnan, matbuğat öçen yasağan belderüdä, Eçke eçlär ministrlığı, öyränülär waqıtında tärtip saqlawçılar yuğarı professional äzerlegen kürsätte, dip äytelde. Räsmi belderülärdä, şuşı öyränülär waqıtında keşelärneñ qulğa alınuı, maşinalarnıñ totqarlanuı , tartıp alınğan maşina dokumentları turında ber süz dä äytelmäde. Qızğanıç, uramda barğanda qulğa alınğan häm säğätlär buyı militsiädä utırğan yeget, 12 säğat buyı maşina dokumentların qaytarunı kötkän ikençe ber Qazan keşese dä, bezgä interwyü birüdän baş tarttı. Bu xaqtağı mäğlümatnı raslaw yäki inqär itü öçen, eçke eşlär ministrlığınıñ matbuğat xezmätenä möräcäğät ittek. Anda, bezdä andıy mäğlümat yuq, dip belderdelär.

«Tatar-inform» agentlığında sorawlarğa cawap birgändä, ministr Äsxät Säfärov, bu öyränülär waqıtında zıyan kürüçelär barlığın tanıdı, ämma, närsäne küz aldında totuın äytmäde. Ul, soñğı öyränülär waqıtında, niçek tä bulsa qıyınlıqlar kiçergän keşelär aldında ğafu ütende. Ämma öyränälär däwam itäçäk, häm alar, ay sayın, ütkäreläçäk, dide. Ul şulay uq, här kemgä üze belän şäxes tanıqlığın yörtergä kiñäş itte. Şik tudıra torğan keşelär, totqarlanıp, şäxesen açıqlanğançığa qädär saq astında totılırğa mömkin, dip añlatqan ministr.

Uramda, soraştıru ütkärgändä, Qazan keşeläreneñ qaysıberläre, öyränülär waqıtında qıyınlıqlar kiçerüen, ikençeläre, ber nindi zıyan kürmäwläre turında äyttelär. Beräwlär, öyränülär waqıtında şäxes tanıqlıqları tikşerelüenä qänäğätsezlek belderde. İkençelär, bu kiräkle häm tüzärlek çaralar, dip cawap qaytardı.

Bikä Timerova.

XS
SM
MD
LG