Accessibility links

дүшәмбе, 5 декабрь 2016, Казан вакыты 23:47

60 yıllıqqa: Suğış çınbarlığın onıtmıyq


Yekaterinburg şähärendä Böyek Ciñüneñ 60 yıllığına bağışlanğan bäyräm çaraları däwam itä.

Bu könnärdä şähärneñ kamera teatrı binasında Ural zıyalıları – yazuçılar, şağirlär, jurnalistlar qatnaşı belän zur ädäbi kiçä uzdırıldı. Kiçädä suğışta qatnaşqan, ul dähşätne işetep tügel, kürep belgän, yöräktän kiçergän veterannar tarafınnan icat itelgän öç kitap täqdir itelde. Alarnıñ avtorları - Yuri Levin, Venedikt Stansev, İraida Oçeretina bu kitaplarnı okop kitapları dip atadılar.

Soñğı yıllarda tarixnı kiredän bozıp yazarğa tırışuçılar küp. Ämma suğış xaqiqätne bozıp, ciñüne könbatış soyuzniklar qazanışı itep kürsätergä tırışuçılar sovet xalqınıñ tiñdäşsez batırlığın yuqqa çığarırğa mataşalar. Kiçä barışında bu temağa küp süz alıp barıldı.

Böyek Watan suğışı tämamlanuğa 60 yıl tulu waqiğası suğış çınbarlığın üz küzläre belän kürep, üz yörägennän kiçergän qaharmannarnıñ sanı bik nıq azayıp, yuqqa çığa baruın da iskärtä. Kiläçäk buın ul xaqiqätne onıtmasın öçen, bik ölkän yäştä bulularına qaramastan, veteran yazuçılarnıñ yöräk köçe salınıp eşlängän bik olı xezmätlär bolar. Kitaplarda oçerklar, dokumental' povest'lar, xikäyälär, şiğerlär tuplanğan.

Monnan tış, tağın berniçä yaña kitap turında da süz alıp barıldı. Şularnıñ berse “Üteneçemne kire qaqmawığıznı sorıym” dip atala. Biredä suğış başlanğannan soñ Sverdlovski ölkäsennän suğışqa irekle räweştä kitärgä teläk beldergännärneñ arxivta saqlanğan un meñnän artıq ğarizasınnan berniçä yöze tuplanğan. Ul ğarizalarnı küz yäşlesez uqu mömkin tügel. İlgä olı qayğı kilgän könnärdä ber genä keşe dä bitaraf qala almağan. Suğışnı ciñü belän tämamlaw näq menä şul patriotlar, üz-üzlären ayamıy köräşkän soldatlar qazanışıdır.

Kiçädä Çiläbe, Tömän ölkälärennän kilgän qunaqlar da bar ide. Veterannarnı Sverdlov ölkä gubernatorı xakimiäte başlığınıñ berençe urınbasarı Aleksandr Levin häm Çiläbe ölkäse gubernatorı urınbasarı Sälim Fatıyxov qotladılar. Sälim äfände üzeneñ çığışında Yekaterinburg şähären Uralnıñ ädäbiät häm şiğriät Mäkkäse dip atap, biredä yäşäp icat itüçe veteran yazuçılarğa Çiläbe ölkäse gubernatorı isemennän qotlaw käğäze tapşırdı. Kiçäne oyıştıruda matdi yärdäm kürsätkän afğan suğışı veterannarı oyışması alarnıñ härbersenä televizor büläk itte.

Kiçädä şulay uq Tatarstannıñ Uraldağı daimi wäkile Rawil Bikbov ta qatnaştı.

XS
SM
MD
LG