Accessibility links

шимбә, 3 декабрь 2016, Казан вакыты 07:54

Mäskäw Başqorstan citäkçelegenä mönäsäbäten üzgärtäme?


Soñğı könnärdä Mäskäwdä çığuçı üzäk gäzitlärdä Başqortstandağı säyäsi-ictimaği xällärgä analiz birgän yazmalar dönya kürde. Xätta moñarçı Başqortstan citäkçelegenä älläni awır süz tidermi torğan waqıtlı matbuğat basmalarınıñ da üz bitlärendä usal-usal mäqälälär çığara başlawı törle uylarğa etärä. Qayber säyäsät belgeçläre fikerençä, Mäskäw Kremle äkrenläp kenä Başqortstannıñ ğämäldäge citäkçelege eşçänlegenä obyektiv bäyä birä başlarğa qarar itkängä oxşıy. Bu yünäleştä üzäk gäzitlär, ğädättä, östän kürsätmä häm fatıyxa bulğaç, därräw eşli başlıy. Üzäk telewidenie qanallarında da Başqortstandağı säyäsätkä, şulay uq täğayın prezident Mortaza Räximovqa häm anıñ ulı Ural Räximovqa qağılışlı tiskäre fikerle tapşırular arta. Çirattağı şundıy tapşıru TVS qanalında efirğa çıqtı. Tanılğan säyäsät belgeçe Dmitriy Orlov şuşı qanalğa birgän äñgämäsendä Başqortstan xaqimiätläreneñ häm Mortaza Räximovnıñ eşçänlegenä analiz yasadı. Ural Räximovnı Başqortstandağı baylıqlarnıñ çın xucası dip belderep, säyäsät belgeçe atası belän ulı arasında kilep çıqqan tartqalaşnı anekdot däräcäsenä citkän xällär dip bäyäläde. Dmitriy Orlov äytüençä, Mortaza Räximovnıñ respubliknıñ yağulıq-energetiqä tarmağın kire däwlät qaramağına qaytarırğa qarar itüe genä Başqortstandağı xällärne cayğa salmayaçaq. Bügenge räsmi xaqimiätlärneñ xalıq aldında abruyı da yuq häm alar cämğiätneñ tormozına äylände. TVS telewidenie qanalına birgän äñgämäsendä Dmitriy Orlov Mortaza Räximovnı Tatarstan prezidentı Mintimer Şäymiev belän çağıştırularğa qarata da üz fikeren äytte. «Älege çağıştıru hiç kenä dä döres tügel, – di Dmitriy Orlov. – Mintimer Şäymiev bötenläy başqa ruxtağı, demokratik qıymmätlärne xörmät itüçe prezident. Ul xalıqqa uñay täesir itep uñışqa ireşä, ä Mortaza Räximov isä üz säyäsäten xalıqnı qurqıtuğa häm basım yasawğa qora».

XS
SM
MD
LG