Accessibility links

шимбә, 10 декабрь 2016, Казан вакыты 17:48

Oppozitsiä köçläre aldağı köräşkä äzerlänä


Başqortstannıñ räsmi matbuğatı respublikadağı oppozisiä köçläre tämam xälsezlände häm xaqimiätlärgä qarşı höcümen tuqtattı, dip belderergä aşıqsa da, bu xäl çın döreslekkä täñgäl kilmi kebek. Oppozisiä köçläre aldağı köräşkä ırğılu öçen köç tuplarğa buldı şikelle. Monı Berläşkän oppozisiä köçläre Koordinasiä şurasınıñ comğa könne ütkän utırışında açıq toyımlarğa bula ide. Çirattağı utırışqa da respublikadağı oppozitsiä köçlärenä kergän baytaq oyışmalar citäkçeläre, şulay uq Başqortstan Däwlät Cıyılışındağı oppozitsiä yaqlı deputatlarnıñ berse Gennadiy Şabayıv kilgän ide. Utırışnıñ kön tärtibenä may häm iyün aylarında oppozisiädäge oyışmalar häm partiälär aldında torğan burıçlarnı tikşerü kertelgän ide. Berläşkän oppozisiäneñ Koordinatsiä şurası citäkçese, Başqortstan Tatar cämägätçelek oyışmaları berlege räise Ramil Bignov kiñäşmädä kereş süz belän çığış yasap, respublikada oppozisiä köçläreneñ aldağı ike ayda köç tuplaw etabı buluın assızıqladı. Anıñ süzlärençä, şuşı waqıt eçendä oppozitsiägä kerüçe här partiä häm ictimaği oyışmalar citäkçeläre rayonnarda häm şähärlärdä üz äğzaları sanın arttıru häm urınnarda xalıqqa Başqortstandağı xäzerge säyäsi xällärne añlatu eşlären aqtivlaştırırğa tieş. Ramil Bignov 26 yündä respublikada urınnardağı üzidärä orğannarına ütäçäk saylawlar mäsäläsenä dä qağıldı. «Bezneñ oppozisiä safları, bu saylawlarnıñ aldan uq yalğanğa häm aldawğa qorılıp ütkärelüen añlap, alarda qatnaşamasqa qarar itte, – dide Ramil Bignov. – Ämma bu möhim çaradan bötenläy çittä qalırğa da cıyınmıybız. Bezneñ wäkillär här saylaw urınnarında küzätüçelär bularaq irtädän kiçkä qädär toraçaq». Bu mäsälädä başqalar da üz fikerläre belän urtaqlaştı. Başqortstan Däwlät Cıyılışı deputatı Gennadiy Şabayıv isä üz çığışında oppozisiä citäkçelärenä häm aktiv äğzalarına naxaq ğäyeplär taşlağan räsmi citäkçelärgä qarata mäxkämä oyışmalarına ğarizälar äzerlänüe barışı belän tanıştırdı. Ul isemlektä Federal iminlek xezmäteneñ Başqortstan buyınça idaräse başlığı Çernokov äfände dä bar. Mäğlüm buluınça, Çernokov äfände bu atnada oppozisiä aldında ğafu ütenmäyäçägen beldergän ide. «Monıñ şulay bulası aldan uq mäğlüm ide inde. Çernokov äfände «ğafu ütenäm» disä qoyaş ikençe yaqtan çığar ide. Ämma bez üz taläplärebezdän çigenmibez», –dide Gennadiy Şabayıv. Utırışta ağımdağı başqa mäsälälär buyınça da eşlekle söyläşü bardı. Kiñäşmädäge çığışlardan şul añlaşıldı:Başqortstan oppozitsiäse xaqimiätlär basımı astında tez çükmägän, ä barı tik aldağı aylarğa köräş alımnarın bilgeläw häm köç tuplaw öçen, kiñküläm çığışlarnı, mitinglarnı waqıtlıça ğına tuqtatıp torırğa bulğan. Köräşneñ töp maqsatı elekkeçä qala – Mortaza Räximovnı xaqimiättän töşerü.

XS
SM
MD
LG