Ural Räximov xaqında närsälär genä söyläsälär dä, nilär genä yazsalar da, anıñ täesire äle haman da köçle bulıp qala. Atnaqiç könne Ufada Ural Räximov citäklägän «Başkirenergo» şirkäte direktorlar şurasınıñ çirattağı utırışı bulıp ütte. Anıñ kön tärtibenä direktorlar sovetınıñ yaña sostavın häm räisen saylaw mäsäläläre kertelgän ide. Direktorlar sowetına 14 äğza saylandı. Räisne saylaw da älläni problema bulmadı: yänä dä Ural Räximovnı «Başkirenergo» şirkäteneñ iñ töp xucası itep qaldırdılar.
Şul uq waqıtta Ural Räximov Ufa şähär şurasınıñ yaña çaqırılış saylawlarında üz keşelären deputat itep ütkärü tırışlıqların da arttıra. Elegräk tä xäbär itüebezçä, Ural Räximov tarafdarları moñarçı da Ufa şähär sovetında zur köçkä iä ide. Xäzer 26 iyündä ütäçäk saylawlarda da alar mömkin qädär kübräk ütep, üz tesirlären saqlap qalırğa omtıla. Citmäsä, xäzer deputat mandatları da küpkä kimede. Xäzer Ufa şähär sovetında nibarı 35 deputat qına bulırğa tieş. Şuña kürä dä köräş kierenke bulmaqçı. Äle 35 mandat öçen 170 kä yaqın keşe däğwa itä dä inde. Ural Räximov tarafdarların deputatlıqqa kandidat itep terkäwgä nindider qarşılıqlar da buluı mäğlüm. Çönki şul xaqta belderep, yağulıq-energetika tarmağı citäkçeläre Başqortstan prokurorına häm Rusiä Üzäk saylaw komissiäse räise Veşnyakov äfändegä şikäyätlär dä cibärgän.
