Accessibility links

җомга, 9 декабрь 2016, Казан вакыты 14:51

Tanılğan tatar ğalime Radik Sibäğätov wafat buldı


Başqortstan tatar cämägätçelege zur yuğaltu kiçerde. Comğa könne töş waqıtında tanılğan tatar ğalime häm cämägät eşleklese Radik Sibäğätov wafat buldı. Äle uzğan atnada ğına Radik ağa Qazannan Ufağa kilgän Tatarstan Ministrlar Kabinetı bülek mödire Kim Miñnullin qulınnan üzenä birelgän «Tatarstannıñ atqazanğan fän eşleklese» digän maqtawlı isemneñ bilgelären qabul itkän ide. Soñğı waqıtta qatı awırğan Radik ağa Sibäğätov ğömereneñ 35 yılın Başqortstan däwlät uniwersitetında möğallimlek xezmätenä bağışladı. Biredä tatar tele häm ädäbiätı uqıtuçıları äzerläwdä armıy-talmıy eşläde ul. Tel fäneneñ iñ qatlawlı ölkälärendäge ezlänüläre häm tabışları, açışları belän Başqortstanda häm Tatarstanda ğına tügel, ä bar törki dönyasında ataqlı ğälimgä äwerelde ul. Filoloğiä fännäre doktorı, professor Radik Sibäğätov Başqortstan tatarları mänfägätlären yaqlawğa da küp köçen saldı. Töp eşennän tış, tatar milli oyışmaları eşçänlegendä dä aktiv qatnaşuı belän respublikadağı tatar mäsälälären çişü yünäleşendä baytaq igelekle eşlär başqardı Radik äfände. Soñğı yıllarda, Başqortstan Tatar kongressı Başqarma komitetı räise urınbasarı wazıyfaların başqarğanda, respublikadağı tatarlar xoquqların yaqlap fänni xezmätlär yazıp qına qalmadı, ä yuğarı mönbärlärdän dä yalqınlı çığışları belän möräcägät itte ul. Ayıruça Başqortstanda tatar telenä dä däwlät tele statusın taläp itüdä üz süzen qatğıy äytte Radik ağa häm bu mäsäläne isbatlap, kire qaqqısız dälillär belän nigezläp, ğilmi tikşerenülären dä bäyän itte. Xäzer inde anıñ igelekle eşlären başqalar däwam itär häm aqsaqal ğälimneñ xıyalların tormışqa aşıru öçen üz köçen salır. Märxümne şimbä könne Ufanıñ Könyaq ziratına mäñgelek yortına küçeräçäklär.

Fänis Fätxi, Ufa

XS
SM
MD
LG