Tatarstanda bu könnärdä Ciñä bäyrämenä äzerlänälär. 9 mayğa qädär äle ike kön bulsa da, şähärneñ üzäk mäydannarında inde säxnälär äzerlilär, uramnarnı bizilär. Veterannar belän dä oçraşular, konsert, qotlawlar däwam itä. Qazanda bu könnärdä BDB häm Baltıyq illärennän kilgän veteran millättäşlärebez qunaq bula. Alar monda Bötendönya tatar kongressı çaqıruı buyınça kilgännär. 6 mayda kongressta suğış veterannarı respublika xökümäte wäkilläre, kongress citäkçelege, jurnalistlar belän oçraştı. Anda veterannar üzläreneñ xatiräläre belän urtaqlaştı, ğözerlären citkerde, xislärgä birelep şiğerlär uqıdılar, Qazanda ozağraq bulırğa teläklären dä äyttelär. Tatarstanğa çaqırılğan qunaqlar arasında Latviädän millättäşebez Fatıx Timerbulatov ta bar ide. Ul üzeneñ elekkege häm xäzerge tormışı turında söyläde.
Min üzem Orenbur ölkäseneñ İmanğıl digän awılda üstem, Ämirxan awılında uqıdım. 9 klass betergäç, suğış başlandı, min suğışqa kittem. Xäzer Rigada yäşim. Anda min suğıştan soñ barıp çıqtım. Germaniädä gospital’dä yatqanda, kilep bezneñ dokumentlarnı, belem däräcälären qarap, qılğan batırlıqlarnı isäpkä alıp, saylıylar ide. Mine Rigada urnaşqan 30nçı xärbi armiägä alıp kittelär. Xäzer min inde xärbi pensioner. Bez, tatar-başqortlar anda bik dus, tatu yäşibez. Xälebezdä kilgänçe berläşergä tırışabız, kiläçäktä tağı da äybäträk yäşärbez, dip uylıym
Ä menä Taşkenttan kilgän millättäşebez Wazıyx Kabaevtan jurnalistlar kübräk anıñ üze tügel, ä onığı turında soraştılar. Tanılğan gimnastka Alinä Kabaevanıñ bala çağı turında anıñ däw ätise Wazıyx äfände bik teläp söyläde. Menä şundıy qızıqlı keşelär buldı bäyräm aldı könnärendä Qazanda.
Gölnaz İlgizär
