Accessibility links

Кайнар хәбәр

Britan premier ministrı Tony Blair 3nçe saylawların ciñep yänä xakimiättä qala


Britaniädä ütkän parlament saylawlarında ciñüne yänä premier ministr Tony Blairnıñ leyboristlar partiäse yawladı. Şulay itep, Tony Blair Britaniä tarixında 3 möddät rättän xakimiättä toraçaq berençe leyborist buldı. Şul uq waqıtta leyboristlar yaña parlamentta, elekkese belän çağıştırğanda, küpkä azraq urın alıp toraçaq. Säbäbe – Ğiraq suğışı.

Tönyaq Angliäneñ Sedgefield bistäsendä, Tony Blair saylanğan okrugta, anıñ parlamentta urının saqlap qalu xäbären menä şulay qarşı aldılar. Beraz soñraq näticälär yasalğannan soñ, leyboristlar partiäseneñ bu yulı küpkä azraq östenlek belän ciñüe açıqlanğaç, Blair bolay dide:

Audio (Tony Blair)

"Britan xalqı leyboristlar xökümäteneñ qaluın teläde, läkin kimegän küpçelek belän. Bez monnan aqıllı häm cawaplı näticä yasarğa tieşbez. Xalıqnı borçığan mäsälälär, saylaw-aldı kompaniäsendä äytelgän ğözerlärne iğtibar üzägenä quyarğa kiräk."

Blair, Ğiraq suğışına quşılu qararı arqasında küp tawışlar yuğaltuın tanırğa mäcbür buldı:

Audio (Tony Blair)

"Bu ildä Ğiraq mäsäläseneñ bik qarşılıqlı mäsälä ikänen beläm, läkin xäzer bez yänä berläşep alğa taba bara alırbız."

Ğiraq suğışınıñ saylawçılarğa niçek täesir itüenä ber genä misal: küp möselman yäşägän London bistäsendä leyborist namzät Oana King köndäşe George Galloway''ğa ottırdı. Galloway Blairğa möräcäğät itep bolay dide:

Audio (George Galloway)

"Blair äfände, bu - Ğiraq öçen. Sez häm partiägez kiçergän bar yuğaltular Ğiraq arqasında. Sez ütergän keşelär, sez söylägän yalğannar sezgä kirese belän äylänep qayttı. Leyboristlar partiäse üzeneñ berençe cıyınında sezne alıp taşlasa bu anıñ iñ yaxşı qararı bulır ide."

Tawışlarnıñ 36 protsentın cıyğan leyboristlar 646 urınlı parlamentta bu yulı 360lap urın alaçaq. Yağni, ğadi küpçelek bulsa da, alarnıñ başqa partiälärdän östenlege bu yulı ni barı 60-70 urın çaması bulaçaq. Elekke parlamentta bu östenlek 160 urın ide. Leyboristlarnıñ töp köndäşläre, 2nçe urın alğan konservativlar da, 3nçe urın alğan liberal-demokratlar da, uzğan saylawlar belän çağıştırğanda 2-3 protsent kübräk tawış cıyıdılar.

Konservativlar citäkçese Michael Howard partiäneñ bu yulı yaxşıraq näticägä ireşüenä qaramastan, ciñelüen tanıp urınınan kitäçägen belderde:

Audio (Michael Howard)

"Miña inde 63, kiläse saylawlarda 68 bula. Min inde partiäne xökümätkä ütkärerlek yäştä tügel."

Liberal-demokratlar citäkçese Charles Kennedy Blairnı ciñü belän qotlap bolay dide:

Audio (Charles Kennedy)

"Min Blairnı qotlıym, läkin mondıy tübän kürsätkeç belän ciñep buluı citdi sorawlar uyata."

Belgeçlär fikerençä, keçkenäräk küpçelek belän Blairğa üz säyäsäten alğa sörü awırraq bulaçaq. Citmäsä, anıñ üz partiäsendä dä şul uq Ğiraq suğışına qarşı çığuçılar bar.

Şul uq waqıtta, ul yaqın arada çitlätelergä mömkin, anıñ urının finans ministrı Gordon Brown alır, digän farazlar bar.

Läkin bu farazlar. Comğa könne Blair Elizabeth patşabikä belän oçraştı häm annan yaña xökümät tözü wäkäläte aldı. Äytkändäy, bügen Tony Blairğa 52 yäş tuldı.

-Ali Gilmi
XS
SM
MD
LG