Accessibility links

шимбә, 3 декабрь 2016, Казан вакыты 16:47

Vladimir Putin: BDB üz köçlären terrorğa qarşı köräştä berläşterergä tieş


Bäysez Däwlätlär Berdämlege illäreneñ Ciñü tantanalarında qatnaşu öçen Mäskäwgä kilgän citäkçeläre bügen ayırım cıyılış ütkärep aldı. Qunaqlarnı qabul itkän prezident Putin BDBneñ kiräklegen qabatlap, anıñ äğzaların üz köçlären terrorğa qarşı köräş öçen berläşterergä çaqırdı.

Üz çığışında ul, 13 yıl buyı yäşäwe däwerendä Bäysez Däwlätlär Berdämlege üzeneñ kiräklegen kürsätte, xäzer anıñ aldında terrorçılıq häm ekstremizm kebek yaña yanawlar tora, häm BDB alarğa qarşı köräştä xälitkeç rol'' uynıy ala dip belderde:

Audio, Vladimir Putin

"Näq menä bezneñ tırışlıqlar arqasında Berläşkän Millätlär Oyışmasınıñ Ğomumi Mäclese 8-nçe häm 9-nçı maylarnı bäxilläşü häm iskä alu könnäre dip iğlan itte häm bar illärne natsilarnıñ bügenge warisı - terrorçılıqqa qarşı köräştä berläşügä çaqırdı. İmanım kamil, BDB şuşı urtaq maqsatqa ireşü eşendä näticäle qoral bula ala" di Rusiä prezidentı Vladimir Putin. Mäğlüm ki, Mäskäw östenlek itkän, 12 elekke sovet respublikasınnan torğan Bäysez Däwlätlär Berdämlege 1991-neñ dikäbrendä, Sovetlar tarqaluı belän oyışqan ide. Yäkşämbedä uzğan oçraşuda "Humanitar xezmättäşlek deklaratsiäse" imzalandı, ul BDB illäre arasındağı humanitar, mädäni häm fänni ölkälärdäge xezmättäşlekne kiñäytüne maqsat itep quya. Läkin şuşı oçraşu alayda, eçke qarşılıqlar häm BDBneñ yäşäyeşe tiräsendäge bäxäslär şäwläse sürätendä uzdı. Gruziä prezidentı Mixail Saakaşvili, Rusiäneñ üz ilendäge ğäskärlären çığarmawına protest itep uzğan atnada Mäskäw tantanalarına barmawın äytte. Anda bügen Azärbaycan prezidentı İlham Aliev tä yuq ide - Ärmänstan belän Tawlı Qarabax tiräsendäge nizaq säbäple ul ärmän prezidentı Robert Koçaryan belän küreşergä telämäwen belderde. Ämma 9-nçı may tantanalarında ul üzeneñ qatnaşaçağın xäbär itte. Gruziä, Ukraina häm Qırğızstanda bulğan soñğı kütäreleşlär Mäskäwneñ elekke sovet cirlärendäge tä''sire kimüen kürsätä. Berniçä kön elek kenä Rusiäneñ İminlek Şurası sekretare İgor'' İvanov şul öç ildäge xakimiat almaşınuın "qanuni tügel" dip atadı. Gruziä, Ukraina, Qırğızstandağı waqiğälär BDB illäre arasında täräqqiatneñ törle yünäleş aluın kürsätä - Kiev häm Tiflistäge xökümät, misal öçen, xäzer kübräk Könbatış belän araların nığıtu yulın saylasa, Belarus'' häm Üzäk Aziä illäre torğan sayın avtoritar yünäleş ala. BDB eçendäge säwdä-iqtisadi bäyläneşlärne elekke xälendä qaldıru niäte dä ğämälgä aşa almadı. Mäskäwdäge oçraşu aldınnan ğına BDBneñ törle äğza illäre arasında törle diplomatik nizaqlar bulıp aldı. Belarus''tä 5 ukrain watandaşın qulğa alu Kiev belän Minski aralarında kierenkelek tudırdı. Belarus'' prezidentı Lukaşenka Mixail Saakaşvilineñ Mäskäw tantanalarına barmaw qararın tänqitläp, Gruziä prezidentı üz veterannarınıñ ciñügä kertkän öleşen añlaw öçen älegä bik yäş şul dip belderde. BDB illäre citäkçeläreneñ bügenge oçraşuı yabıq şartlarda ütte. Kiläse cıyılışnı alar august ayında Tatarstan başqalası Qazanda ütkärü xaqında kileşte. Töp mäs''älä bulıp anda Berdämlekneñ kiläçäge turında äğza illär arasında säyäsi fikerläşü ütkärü toraçaq. Bu xaqta yäkşämne oçraşuınnan soñ Ukraina prezidentı Viktor Yuçenko belderde.

Kärim Kamal
XS
SM
MD
LG