Accessibility links

чәршәмбе, 7 декабрь 2016, Казан вакыты 13:44

Peterburdağı veteran millättäşlärebez “Grand Hotel Europa” qunaqxanäsendä xörmät itelde


6 mayda Peterburgnıñ iñ qupşı dip yörtelgän qunaqxanäse “Grand Hotel Europa”da yäşäwçe çit il qunaqları öçen hiç kötelmägän tamaşa buldı - xärbi kiemnär kigän, orden-medällär taqqan, qolaq işetmägän teldä söyläşüçe suğış veterannarı “Europa” restoranına töşke aşqa cıyıla başladı. Başta çit il qunaqları aptıraw qatış qızıqsınu belän çittän genä küzätep torsalar, soñraq bezneñ veterannarıbıznı qaysı qultıqlap, qaysı qoçaqlap sürätkä töşä başladılar.

Peterburg eşquarlarınıñ milli-mädäni möxtäriät belän berlektä millättäşlärebez öçen oyıştırğan bäyräm kiçäse menä şulay başlanıp kite. Veterannarıbıznı qotlarğa Qanunnar cıyılışınnan da, Smolnıydan da, Başqortstan häm Tatarstan respublikalarınıñ daimi wäkilläre dä kilgän idelär. Çığış yasawçılar tatarlarnıñ frontta batır, ışanıçlı iptäş häm suğışçı buluların assızıqlap üttelär. Tatarstannıñ daimi wäkile Şamil Äxmätşin prezident Mintimer Şäymievnıñ qotlaw telegrammasın uqıdı häm Tatarstan xökümäte isemennän iñ ölkän yäştäge veterannarğa büläk tapşırdı. Qotlawlarnı cır, muzıka, biyülär belän alıştırıp tordı. Millättäşlärebez Rafael İlyasov başqaruında suğış yıllarında kiñ taralğan “German köye”, “Şaxta” kebek cırlarnı tıñlap läzzätländelär, Albert Äsädullinğa iärep front cırların da cırlap aldılar. Ä inde säxnägä Zöhrä Säxäbieva çıqqaç, şundıy qızıp kittelär ki, Zöhrägä üzennän üze tamaşaçılar solistı bulıp kitkän Üzbäk abıyğa mikrofon totıp qına torırğa qaldı.

Suğış qaharmannarı–millättäşlärebezne ezläp tabu, alarnı bergä cıyu, aqça yünätü, bäyräm tabını oyıştırunıñ awırlığın eşläp qarağan keşe genä beläder. Kiçäne oyıştıruçı, alıp baruçı - Orenbur qızı Älfiä Räxmätullina.

Kiçägä äzerlek waqıtında, ber utırıp aşar öçen nigä kiräk şul qädär aqça tügärgä, şul aqçağa härber veteranğa sanatoriğa yullama birsälär, faydası kübräk bulır ide, - diyüçelär dä buldı. Ber yaqtan, bälki, şulaydır da. İkençe yaqtan, inde urıslaşıp betkän, distä yıllar millättäşläre belän aralaşmağan ber babaynıñ, küz yäşlären dä tıya almıy “Sez min niçek, qayan ezläp taptığız?”,- dip özgälänüen onıtırğa mömkinme soñ? Tel beleme “şatlıqtan özgälänü” digän töşençägä qarşıdır, ämma bu çınlap ta zur suğışnıñ ğadi ber soldatınıñ tuğan telen, tuğan moñnarın işetü şatlığınnan, küñele tuludan özgälänüe ide. Ber genä keşegä şul qädär söyeneç birsä dä, kiçäne yuqqa aqça tügü dip äytep bula mikän? Ä alar ike yözgä yaqın idelär, Böyek Watan suğışında ciñüçelär! Aralarında nindi genä front wäkilläre yuq! 85 yäşlek Aleksandr Xäsän ulı Möxämmätov - seber tatarı, Tönyaq frontta elemtäçe bulğan, Qızıl Yoldız häm Watan Suğışı ordennarı kavalerı, 1945 Mäskäwdä Ciñü paradında qatnaşqan keşe. Doşman tılınnan “tel” alıp qaytu ostalığı öçen paradqa aldılar,- dip kölä ul. “Tel” alırğa master bulsa da, telgä bik osta tügel. Osta da tügel, tatar telen dä onıtıp bara. “Min barısın da añlıym, oyıştırıp söyli belmim şul”,- dip oftana Aleksandr Xäsän ulı. Şuña kürä bezneñ söyläşü dä bik qızıq kilep çıqtı: min tatarça sorıym, ul rusça cawap birä.

Kiçä axırında barça veterannarnı sürpriz - kinolardağı kebek “60 yıl” dip yazılğan, orden tasması belän bizälgän, utları yanıp torğan zur tort, küçtänäçkä - tämle çäy häm çäçäklär kötä ide.

Kiçädän soñ baytaq qına waqıt gäpläşep tä utırdılar. Ciñüneñ 70 yıllığına kem qalır da, anda da şulay äñgämä qorıp utıra alırlarmı bezneñ qaharmannarıbız? Qızğanıçqa qarşı, rätlär yıldan yıl sirägäyä bara şul. Şulay bulğaç, qäderlären belep qalası ide. Başqortstannıñ daimi wäkile äytmeşli, 10 Maydan soñ da veterannarnı istän çığarmasaq ide.

Gölzada Kamalova, Peterbur

XS
SM
MD
LG