Accessibility links

җомга, 9 декабрь 2016, Казан вакыты 18:42

Amerikan prezidentı Gruziäneñ töbäktä demokartiä taratuına yuğarı bäyä birde


Düşämbedä Mäskäwdä ütkän Ciñü tantasınnan soñ amerikan prezidentı George Bush Yevropa säfären däwam itep Gruziägä kilde. Sişämbedä Tiflis üzägendä anı meñlägän keşe qarşıladı. Gruziä prezidentı Mixail Saakaşvili Bushnıñ Gruziägä kilüen üz ile öçen zur säyäsi qazanış dip atadı.

Yıl yarım elek gölçäçäk inqilabı şawlağan Gruziä başqalası Tiflisneñ Tavisupleba, yağni Azatlıq mäydanında, sişämbe irtäsendä alma töşär urın yuq ide. Amerikan prezidentın sälämnärgä kilgän distälägän meñ keşe Bush belän Saakaşvili kürenügä amerikan häm gruzin bayraqların bolğap alqışlarğa totındı. Bush alarnı gruzin telendä "xäyerle irtä" dip sälämläde:

Audio (George Bush): "Gamardjoba!"

Bushnıñ här cömläse diärlek alqışlarğa kümelde:

Audio (George Bush): "Azatlıq xaqına ruxi täwäqqällek kürsätkän prezidentığız belän yänäşä toruıma ğorurlanam."

"Qunaq aşı qara-qara qarşı", yänäşädä yılmayıp torğan Saakaşvili Bushnı azatlıq köräşçese dip zurladı häm anıñ Gruziägä dus bularaq kilüen äytte:

Audio (Mixail Saakaşvili): "Tarix barışında bu şähärgä küp imperiä citäkçeläre kilde, läkin alar Gruziägä basıp aluçı sifatında kilde. Bügen Gruziä tarixında berençe tapqır monda dönyanıñ iñ qüätle däwlät citäkçese. Min anı ğorurlanıp sälämlim."

Bush Gruziäneñ bar töbäkkä häm elekke sovet illärenä demokratiä taratuğa kertkän öleşenä yuğarı bäyä birde:

Audio (George Bush): "Soñğı aylarda dönya Bağdadtan alıp Bişkäkkä qädär şaqqatırlıq ömetle üzgäreşlärgä şahit buldı. Läkin Ğiraqtağı cete qızıl, Ukrainadağı äflisün, Livandağı erbet inqilaplarına qädär Gruziädä gölçäçäk inqilabı buldı."

İnqilapnıñ äle berençe genä adım buluın iskärtep, Bush gruzinnarnı alğa taba da demokratik institutlar qorırğa, azçılıqlar, oppozitsiä ixtiram itelgän, süz ireklege bulğan yaña Gruziä tözergä çaqırdı.

Saakaşvili, Gruziäneñ alğa taba da Amerikanıñ dönyada demokratiä taratuda partnerı bulaçağın ışandırdı. Ser tügel, Saakaşvili Rusiä belän tartışuda Quşma Ştatlarnı üzeneñ teräge itep kürä. Gruziäneñ NATO häm Yevropa Berlegenä kerüen töp maqsat itep quya. Bush Gruziäneñ bu niätlären xuplasa da, moña ireşü öçen separatist töbäk konfliktların tınıç yul belän xäl itergä çaqırdı:

Audio (George Bush): "Bez Gruziäneñ Yevropa institutlarına quşılu niätenä ixtiram belderäbez, NATO belän yaqınayuın xuplıybız. Gruziä citäkçeläre atlantik aşa berlekkä quşılu öçen konfliktlarnı tınıç yul belän çişü kiräklegen belä. Berük waqıtta Gruziäneñ bötenlege häm möstäqillege başqa illär tarafınnan da ixtiram itelergä tieş."

Saakaşvili üzbilgelängän Abxaziä häm Könyaq Osetiäne tınıç yul belän Tiflis qaramağına qaytarırğa wäğdä itä. Rusiä belän tığız bäyläneştä bulğan bu ike töbäk 80nçe yıllar axırı, 90nçı yıllar başında Gruziädän çığuın beldergän ide.

Mäskäwdä küplär Bushnıñ Tiflis säfären xuplamıy, elekke sovet illärenä tıqşınu dip bäyäli. Rusiäneñ Gruziädäge xärbi nığıtmaları tiräsendäge qarşılıqlar säbäple Saakaşvili Mäskäwdäge ciñü tantanalarına kilmäde. Bush isä Mäskäwdän Tifliskä oçıp, Putinnıñ, bu nığıtmalarnı İstanbul kileşüläre nigezendä Gruziädän çığaru wäğdäsen alıp kilde.

Şulay itep Latviada başlağan Yevropa säfären Bush, Hollandiä häm Rusiädä däwam itep, Gruziädä tämamladı. Saakaşvili süzlärenä qarağanda aña iñ oşağanı Gruziä bulğan. Amerikan prezidentı Gruzin xalqınıñ qunaqçıllığına, aşlarına, biyülärenä yuğarı bäyä birde. Konsert barışında xättä säxnägä menep biep tä kürsätte.

-Ali Gilmi
XS
SM
MD
LG