Accessibility links

якшәмбе, 4 декабрь 2016, Казан вакыты 17:26

Qazanda märtäbäle qunaqlar öçen maxsus şähärçek tözelä


Rusiä başqalası Mäskäwdä 9 may tantanaları uzıp, inde matbuğat çaraları anda bulğan waqiğalarnı çäyni, analizlıy başladılar. Süz kübräk, İkençe dönya suğışınıñ näticälären yañadan qarap, aña bäyä birü, Rusiäneñ älege suğışqa kertkän öleşen artıq küpertep kürsätü xaqında bara. Monnan tış, Amerika quşma ştatları prezidentı Buşnıñ, BDB illäre citäkçeläreneñ Mäsäkäwdäge tantanalarda qatnaşuı turında da şaqtıy küp söylänelä. BDB illäreneñ qaysı citäkçese niçek oçraşqan, nindi täqdimnär belän çıqqan –bolar xaqında da çit yat itmilär qaläm ähelläre. Älege BDB illäre citäkçeläreneñ räsmi bulmağan sammitında kem kemgä qul birgän dä, kem kem belän yänäşä basıp torğan, niçä minutta Mäskäwgä kilep citkän bolar älbätä qızıq. Läkin, menä älege citäkçelär Qazanğa kilgäç, nilär yazarlar ikän, Mäskäw qäläm ähelläre. Yılmayırğa kiräkmäs. Qazanda, bıyılnıñ 25 avgustında BDB illäreneñ barlıq prezidentları da qunaq bularaq kötelä. Alarnıñ bu oçraqta inde räsmi sammitı Qazanda uzaçaq. Mäskäwdä waqıtta, Ukraina prezidentı Viktor Yuşçenko , BDBnıñ kiläçäge xaqında söyläşülärne Qazanda däwam itärbez dip belderde. Ul, şulay uq, BDB illäre liderları da şundıy qararğa kilde digän belderü yasadı. Kemnär kiler, anısı älegä tögäl bilgele tügel. Ä menä, tınıç inqilab yasap, xakimiätkä kilgän Ukraina liderı inde kiläçägen üz awızınnan äytte. Qızığı şunda, Tatarstan bügenge köndä Uqraina belän bik tığız xezmättäşlek itä. Bigräktä iqtisat, yağulıq mä’säläsendä. Ukrtatnaft şirkäte, Ukraina öçen dä, Tatarstan öçen dä olı biznes bulıp tora.

Äle BDB illäre citäkçeläre bıyıl Qazanğa kilep, BDBnıñ kiläçäk yazmışı xaqında söyläşülärne däwam itärbez digän belderülär genä yasıylar anısı. Ä Qazanda isä, bu märtäbäle qunaqların qabul itü öçen zur eş bara. Kreml' belän Qazan milli-mädäni üzäge arasında, Qazansu yarında BDB illäre citäkçeläre öçen maxsus şähärçek tözelä. İke-öç qatlı binalardan torğan bu yortlarnı kürüçelär, ah, menä tağın üzlärenä tözi inde citäkçelär dip zarlanmasqa bula. Bu, Tatarstanğa kilgän dönya liderları öçen yäşäw urınnarı. Döres, alar bulıp kitkäç, älege binalarda ni urnaşır –älegä bilgele tügel. Ä qayber millätçelär, bäysez Tatarstandağı çit il wäkillekläre bulaçaq dip yılmayalar.

Räfis Cämdixan

XS
SM
MD
LG