Accessibility links

якшәмбе, 4 декабрь 2016, Казан вакыты 23:33

Suğış qaharmanı tügel...


Ciñü bäyräme, faşizmnı tarmar itü uñayınnan zur tamaşalar quyıldı, büläklär taratıldı. İsän qalğan veterannarğa ixtiram kürsätelde, alarğa räxmät süzläre äytelde. Ber uñaydan tarixnı häm ilne zurlawğa xärbi- patriotik tärbiägä, propagandağa zur iğtibar birelde. Kemneñ dokumentları, orden- medal'läre isän qalğan. kemneñ tärcemäi xäle tärtiptä şuñar mäğlüm östenleklär, räxmät- xörmät ğämälläre eşlände. Kemgä fatir, kemgä östämä pensiä, kemgä Oka maşinası. Ölkännär moña layıqlı. Menä 60 yıl inde alar ikençe Bötendönya suğışında kiçergännäre belän yäşi. Şundıy uy kilä. Ä yäşämägännäre? Berniçä distä yıl elek yara, awırulardan wafat bulğannarı, xäter arbasınnan töşep qala tügelme? Alarğa inde fatir da, daru da kiräkmi. Ä ikençeläre… Häm alar bik küp - 27 millionnan artıq, şul uq yıllarda suğış utında häläk bulğan. Alar da veteran bula almadı, orden- medal'lär dä tapşırılmadı. Alar tükkän qan häm yäş yılğasınıñ tiränlegen beläbezme? Häm alar häläkäteneñ mäğnäsen xäzerge tormış aqmıymı.

Qazanda yäşäwçe Äskär babay bötenläy suğış veteranı tügel, anıñ xärbi ordennarı da yuq. 70 yäşen tutırıp kilüçe babaynı maxsus cıyınnarğa da çaqırmıylar. Çönki ul suğışta bulmağan häm ul tarixnı xäterli. Başqortstanınıñ İleş rayonında keçkenä kenä Cäyläw isemle awıl bar. Şul awılda ber yulı 12 keşe frontqa kitkän. Şularnıñ ikese äylänep qaytqan, ä qalğannarı berençe könnärdä ük xalät bulğan. Şul isäptän Äskär babaynıñ ätise Xaci da ber tapqır da öyenä xat yazıp ölgermägän.

Bez Äskär babay İmamovnıñ Qazan yanındağı baqçasında utırabız, ul üzeneñ suğış tarixın söyli Suğış başlanğanda aña 6 yäş tä tulmağan bula. Ber apası, öç señlese häm ber enese näq şul waqıtta sabıy çaqlarında açtan häm awırudan ülgännär. Äskär abıy şul sabıylarnıñ isemnären häm yözlären xäterli Alihä, Göliä, Änisä, Ğabidi. Berwaqıtta da mäktäpkä barmayaçaq häm veterannar isemlegenä barmayaçaq. Alar da ätiläre kebek suğış qorbanı. Tarix alarnı isäpkä almıy, Äskär abzıynıñ küñelendä alar.

Qazanda yäşäwçe Äskär babay İmamov 5 balalı ğailädän yalğız qalıp, ayaqqa basa, yaxşı belgän bula. Üsemleklärne ximiä yärdämendä yaqlaw, ekologiä buyınça dissertatsiä yaza. Äskär babaynıñ tormış iptäşe Nuraniä belän üstergän ulları Almaz Qazannıñ baş sanitar tabibı, meditsina fännäre doktorı, qızları da doktorlıq dissertatsiäsen yaqlağan. Alarnıñ dönyağa kilüe , üsüe 6 yäştä sarıq muyınındağı qapçıqqa başaq tutırıp, änisen häm señellären aşatqan Äskärneñ batırlığı näticäse.

Räsmi tarix, säyäsi - patriotik propaganda mondıy waqiğalarnı berniçek tä isäpkä almıy. Pensioner Äskär babay İmamov säyäsi- patriotik tamaşalarda ul qatnaşmıy da, ämma ul bar häm fikere belän yäşäp yata. büläklänüçelär, qotlaw aluçılar isemlegenä kermägän. Ul suğış veteranı tügel, ämma ul bar häm barsın da xäterli.

Rimzil Wälı

XS
SM
MD
LG