Accessibility links

Кайнар хәбәр

Ural Räximov üz qaramağındağı milekne däwlätkä qaytarırmı?


Atnaqiç könne Başqortstan Arbitraj mäxkämäsendä respublik prezidentı Mortaza Räxmovnıñ ulı Ural Räximov qaramağındağı qayber şirkätlärne kire däwlät qaramağına qaytaru buyınça utırışlar başlandı. Elegräk tä xäbär itelüençä, ike yıl elek prezident Mortaza Räximov färmanı belän, respublik yağulıq-energetiqä qompleksına qarağan iñ ere şirkätlär, şul isäptän «Başneft» häm «Başkirenerğo» şirkätläre dä xosusıylaştırılğan ide. «Başkirskiy qäpitäl» dip atalğan cämğiätkä berläşte ul şirkätlär häm alarnıñ barsına da citäkçe bulıp prezidentnıñ ulı Ural Räximov täğayınlände. Älege xäl respubliknıñ kiñ cämägätçelegen näfrätländerä ide. Xalıq arasında «Başqortstannıñ böten baylığı xäzer Räximovlar ğäiläse häm alarnıñ yaqınnarı qulında» dip söylädelär. Bu xäl niqädär genä rizasızlıq tudırsa da, bilgele inde anı awızlıqlaw öçen, kiñ cämägätçelek berni dä eşli almıy ide. Gärçä, uram cıyınnarında böten baylıqnı üz qullarına alğan Räximovçılar klanın süksälär dä, bu älläni näticä birmäde. Ämma, bu ğädelsezleklärgä Mäskäw tarafları da iğtibar itte häm nıqlı tikşerü ütkärgännän soñ, Başqortstan yağulıq-energetiqä tarmağınıñ qanunsız xosusıylaştırıluın tanıdı.

Ä bıyıl fevräl ayında Mortaza Räximov belän anıñ ulı Ural arasında qarşılıq buluı açıqlandı. Menä şunnan soñ prezident üze dä ulı qulındağı şirkätlärne kire däwlät qaramağına qaytarırğa qarar itüe xaqında belderde. Ämma monı Arbitraj mäxkämädän başqa xäl itep bulmıy ide. Şuña kürä kiçä bu eşne mäxkämä utırışında qarıy başladılar häm berençe tikşerügä «Başneft» şirkäte eşçänlegen quydılar. Xoquq belgeçläre dä, Ural Räximovnı yaqlağan adwoqatlar da utırışta üz dälillären kiterergä tırıştı. Kiläse utırış şimbä köngä bilgelände. Anda «Başkirenerğo» şirkäte eşçänlegenä dä bäyä bireläçäk. Qayber xoquq belgeçläre farazlawınça, älege mäxkämä mirowoy kileşü belän tämamlanıp, Ural Räximov qaramağındağı şirkätlär aqsiäläreneñ däwlätkä qaytarıluı da bik mömkin. Yağni bu mäsälädä älläni tartqalaş bulmawı da ixtimal.

Arbitraj mäxkämäse utırışları başlanğan könne tağın ber yañalıq mäğlüm buldı. «Başneft» şirkäteneñ bıyıl ğinwar ayında ğına wazıyfasınnan alınğan elekke generäl direktorı İldar İsxaqov atankiç könne Başqortstan Däwlät Cıyılışı-Qorıltay deputatı mandatın waqıtınnan alda tapşıruı xaqında ğärizä yazğan. Moña qädär dä Ural Räximovnıñ tarafdarları bulğan häm fevräl ayında parlamentta bola kütärergä mataşqan tağın öç deputat, şulay uq üz teläkläre belän, deputat mandatınnan baş tartqan ide.
XS
SM
MD
LG