Accessibility links

якшәмбе, 11 декабрь 2016, Казан вакыты 01:16

Başqortstan oppozitsiäse cirattağı mitingnı 22 iyüngä bilgeläde


Comğa könne Ufada Başqortstannıñ Berläşkän oppozitsiäse Qoordinatsiä şurası üzeneñ çirattağı utırışın ütkärde. Anda ağımdağı mäsälälär tikşerelde häm Ufada kiläse uram cıyınınıñ waqıtı turında kileşende. Törle ictimağıy oyışmalar häm partiälär citäkçeläre çığışlarınnan soñ, Ufada respublik xaqimiätlärenä qarşılıq cıyının 22 iyündä oyıştırırğa qarar ittelär. Mäğlüm buluınça, 26 iyün könne Başqortstanda urınnardağı üzidärä orğannarına saylawlar ütkärelä. Oppozitsiä wäkilläre: «Bu saylawlar da elekkeçä, xaqimiätlär ssenarie buyınça ütäçäk häm anda gel uñaylı keşelär genä deputat häm xaqimiät başlıqları bulıp saylanaçaq, – dip belderä. – Şulay bulğaç anda qatnaşu xaqimiätlär tegermänenä su salu kebek kilep çığa». Xaqimiätlärneñ şuşı küz buyawına qarşılıq yözennän, saylawlarğa sanawlı ğına könnär qalğanda, Ufada uram cıyını oyıştırıp, rizasızlıq belderü bik tä urınlı bulaçaq, digän urtaq fikergä kilde oppozitsiä oyışmaları citäkçeläre. Alaysa äle küpçelek xalıq bu saylawlar xaqında berni dä belmi häm yaxşılap añlamıy. «Kiñ cämägätçelekkä respublik türäläreneñ çirattağı yalğanın töşenderep birü öçen, üzebezneñ bäysez gäzitlärneñ çirattağı sanın tulısınça şuşı temğa bağışlarğa kiräk», – dip belderde Berläşkän oppozitsiä citäkçese, Başqortstan Tatar cämägätçelek oyışmaları berlege räise Ramil Bignov. Mitingnı oyışqan töstä ütkärü öçen, här oyışma häm partiä üzennän cawaplı keşelärne täğayınläde. «Rus'» ictimağıy berläşmäse citäkçese Anatolıyy Dubovskiy, Başqortstan Däwlät Cıyılışı deputatı Gennadiy Şabayıv häm başqa çığış yasawçılar çirattağı mitingqa centekle äzerlänü häm küp xalıqnı cälep itügä bäyle üzläreneñ eşlekle täqdimnären yañğırattı.

XS
SM
MD
LG