Accessibility links

якшәмбе, 4 декабрь 2016, Казан вакыты 00:54

Respublika tatarları 22 iyündä qorıltay ütkärä


Comğa könne Başqortstan Tatar cämägätçelek oyışmaları berlege idaräse dä üzeneñ çirattağı utırışın ütkärde. Anıñ kön tärtibenä Başqortstan tatarlarınıñ zur qorıltayın ütkärü mäsälälären qaraw kertelgän ide. Mäğlüm buluınça, Başqortstan tatar milli oyışmaları bıltır, respublik Tatar milli-mädän moxtäriäten tözü maqsatında, qorıltay ütkäräçäge turında beldergän ide. Ämma, räsmi xaqimiätlär bu eşkä törleçä ayaq çalu säbäple, ul qorıltaynı uzğan yılnıñ noyäbr azağında Mäskäwdä ütkärergä mäcbür buldılar. Bilgele inde, küp çığımnar taläp itelüe arqasında, il başqalasına deleğätlarnıñ barı tik 150se genä bara aldı. İnde menä bu qorıltaynıñ ikençe öleşen Ufada barlıq deleğätlarnı da, ä alar 1000 keşegä yaqın, çaqırıp zur qorıltaynı ütkärergä buldılar.

Bügenge utırışta qatnaşuçılar ul qorıltaynıñ täğayın köne xaqında fiker alışqannan soñ, anı 22 iyüngä bilgelärgä kileştelär. Ämma äle bu soñğı qarar tügel. Kiläse atnada 20 may könne tatar milli oyışmalarınıñ kiñäytelgän utırışın cıyğaç, anda bu kön buyınça tağın fiker alışıp, axırğı qararğa kilergä uylaştılar.

Söyläşü barışında Başqortstan Tatar ictimağıy üzäge räise Ayrat Ğiniätullinıñ da çığışı tıñlandı. Ul Başqortstan Tatar ictimağıy üzäge tiräsendä kilep tuğan xällär xaqında täfsille mäğlümatlar birde. Elegräk tä xäbär itelüençä, Rusiä Yüstitsiä ministrlığınıñ Başqortstan buyınça Baş idaräse törle säbälär tabıp, Başqorsttan Tatar ictimağıy üzägen yabu mäsäläsen qarawnı sorap, Ufanıñ Kirov rayonı mäxkämäsenä möräcägät itkän ide. Mäxkämäneñ berençe utırışı uzğan atnada ütte dä inde. Anda älegä ike tarafnıñ da dälilläre tıñlandı, ämma bernindi qarar da çığarılmadı. Ä kiläse utırış 19 mayğa täğayınlände. Ayrat Ğiniätullin Yüstitsiä ministrlığı idaräseneñ däğwaları xaqında söyläp, alarnıñ Tatar ictimağıy üzäge eşçänlegen tuqtatu öçen nigezsez buluın äytte. Ul şulay uq, yañadan terkälü ütü öçen, Tatar ictimağıy üzägenä yaña qorıltayın ütkärü ixtıyacı turında da belderde. Bu xaqta utırışta qatnaşuçılarnıñ da fikerläre tıñlandı. Azaq kilep, urtaq ber fikerne xupladılar:Başqortstan Tatar ictimağıy üzäge qorıltayın da, Başqortstan tatarlarınıñ zur qorıltayın ütkärgän könne ük, yağni 22 iyündä ütkärü döres bulır, didelär. Çönki bar respubliktan atlağan sayın yözlärçä keşene Ufağa cıyu berdän küp finanslar taläp itä, ikençedän keşelärne töp eşennän häm başqa mäşäkätlärennän ayıra.

Söyläşüdä Başqortstan Tatar kongressı Başqarma qomitetınıñ da kiñäytelgän utırışın ütkärü könen bilgelädelär. Anı respublik rayonnarınnan da wäkillärne çaqırıp, 17 may könne ütkärergä kileştelär. İnde xäbär itelüençä, aprel azağında Başqorstan Tatar kongressı Başqarma qomitetına yaña räis saylanğan ide. Bu wazıyfağa saylanğan professor Ruşan Ğallämov respublik Tatar kongressı eşçänlegen canlandıru häm täesirleräk itü yünäleşendä kiläse atna sişämbesendä ütäçäk cıyında üzeneñ eşlekle täqdimnären kertäçägen belderä. Ruşan äfände Başqortstanda xalıq sanın alu näticälären kire qarawnı häm respublikta tatar telenä dä däwlät tele statusı birüne qatğıy taläp itüçe millätpärwär. Kongress eşçänlegendä dä iñ berençel burıçlar itep şuşı maqsatlarğa ireşüne quya ul.

XS
SM
MD
LG