Ukrainada säfärdä bulğan Törkiäneñ tışqı eşlär ministrı Abdulla Gül Ukraina xökümäte başlığı Yulia Tımoşenko belän Kievta oçraşqannan soñ bügen Qırımğa kilde. Säfärneñ maqsatı – Qırım belän tanışu. 12 mayda uzğan Qırım yuğarı radasınıñ çirattantış utırışında İstanbulda Qırım wäkilçelegen açu, Krasnodar häm Mäskäwdä eşläp kilgän wäkilçeleklärne yabu turında süz buldı. Rusiä yaqlı deputatlar, Törkiädäge qırım tatarları öçen däwlät xisabına urın totu urınsız, dip bu täqdimgä qarşı çıqqan. Ämma İstanbulda Qırım wäkilçelegen açu, qırım tatarları öçen genä tügel, ä Qırımğa Törkiädän investisiälär cälep itü belän bäyle, dip xäbär itelä. Älegä bu mäsälä açıq qaldı.
