Accessibility links

якшәмбе, 4 декабрь 2016, Казан вакыты 23:32

Üzbäkstan prezidentı fetnäçelärne xakimiätne bärep töşerü tırışlığında ğayepläde


Üzbäkstan prezidentı İslam Kärimov könçığıştağı Andican şähärendäge köç qullanuda töbäktäge islam extremist törkemnären ğayepläde. Bäreleşlärdä 30ğa yaqın keşe hälak buldı, dide Kärimov. Ämma şaxitlär süzlärenä qarağanda, bu san küpkä artığraq. Üzbäkstannıñ könçığışında fetnä däwam itä.

Şimbä könne Taşkentta uzğan matbuğat oçraşuında Üzbäkstan ilbaşı İslam Kärimov, fetnäçelärgä ut açırğa quşmağanın belderde. Andican xakimiäte binasın üz kontrolenä alğan fetnäçelär öçen keşe ğömere ber ni dä tormıy, dide ul:

"Ğailä äğzälären, olılarnı häm balaların xakimiät binası tiräsenä quyıp alardan divar tözelde, anda yaqınça 300 keşe bulğan"

Çualışlarda Kärimov Hizb ut-Tahrir oyışmasın ğayepläde, mart ayında könyaq Qırğızstanda da näq şul köçlär fetnä kütärep xakimiätne bärep töşerde, dide.

Hizb ut-Tahrir bu ğayepläwlärne kire qağıp, Kärimovnıñ reaksiäsen – köçsez rejimnıñ törkemgä tağın ber tapqır tap töşerü tırışlığı, dip bäyäläde.

Üzbäkstan prezidentı mäğlümatlärenä qarağanda, atışlarda 30ğa yaqın keşe hälak bulğan, alar arasında eçke eşlär ministrlığı xezmätkärläre dä bar. 100gä yaqın keşe cärähätlär alğan, dide Kärimov. Ämma tabiplar häm Andicandağı xällärne üz küzläre belän kürgän şaxitlär, hälak bulğannarnıñ sanı küpkä yuğarı, häm ülüçelär arasında xatın-qızlar häm balalar bar, di.

Çit il jurnalistlarına şähärdän kitergä quşılğan. Bäysez mäğlümat alu mömkinlege yuq däräcädä.

Bügen Andicanda yañadan atışlar bulğanı mäğlüm. Şähärdä radiobıznıñ taciq redaksiäse xäbärçese Mirasror Farğaniy bulğan:

"Köndez säğat yarım qatı atışlar buldı. Bez xakimiät yanındağı ber binanıñ bazına töşep utırdıq. Tıştan kilgän tawışlarğa qarağanda, böten binalar cimerelep betkän digän xis qaldı. Böten keşe qaçırğa tırıştı"

Bügen qarşılıq çarası Andicannıñ könçığışına da taraldı. Meñgä yaqın keşe Qırğızstanğa ütep kergän dip xäbär itelä. Azatlıq radiosınıñ üzbäk redaksiäse xäbärçese Elmurad Yusupaliev Qırğızstan belän çik buyındağı Qarasu şähärendä bulğan.

"Bügen irtän berniçä meñ keşe Andican rayonınıñ Qarasu şähäre başlığı utırğan binağa bärep kerep xakimiätneñ berniçä xezmätkären qıynadı. Şähär başlığın totıq itep aldı. Min üzem üzbäk yağınnan qarap tordım. Alar şähär merına binanıñ tübäsenä menep, Kärimov säyäsätenä täñqit belderergä quştı. Yuqsa anı irekkä çığarmawları belän yanadı. Milisiä qaçtı, çik saqçıları da yuqqa çıqtı," dip söyläde radiobıznıñ Üzbäkstandağı xäbärçese.

Andicanda bu çualışlar comğağa qarşı töndä başlandı. Fetnäçelär Äkrämiä islam törkemenä qatnaşı buluda ğayeplängän totqınnarnı azat itü öçen törmägä höcüm itte, soñınnan xakimiät binasın kontrolgä aldı. İminlek köçläre cıyılğan xalıqqa ut açtı.

Aq Yort kiçä köç qullanunı tuqtatırğa çaqırdı.

Alsu Qormaş
XS
SM
MD
LG