Accessibility links

дүшәмбе, 5 декабрь 2016, Казан вакыты 23:52

Könçığışnı öyränü institutı yubileyın bäyräm itte


Bügenge köndä dönya mädäniäte mul'tikul'turalizm, yäğni mädäniätlärneñ waqlanuı, alarnıñ üzara tigezlänüe çorına kerep bara. Könbatış illärendä bu küreneş tuqsanınçı yıllardan uq küzätelä. Äkrenläp kenä ul bezneñ mädäniättä da çağılış taba başladı. Mul'tikul'turalizm mädäniät öçen nindider konkret ürnäk bulmawınnan ğibärät.

Şuşı küreneş 13 may könne Uniksnıñ konsertlar zalında çağılış taptı. Ul könne universitetnıñ könçığış bülegeneñ yañadan torğızıluına 15 häm fakul'tet bularaq eşläwenä 5 yıl tulu uñayınnan mäcles ütkärelde. Bülekne yañadan torğızu eşendä Dilärä Tumaşeva, Mirqasıym Ğosmanov kebek ğalimnärebez zur xezmät quyğannar ikän. Bügen anıñ başında Cämil Zäynullin tora. Untuğızınçı ğasırda uq tyurkologiäne üsterü ölkäsendä zur eşçänlek kürsätkän könçığış bülege, bügen könçığışnı öyränü fakul'tetınıñ torışın yubiley mäclesendä sınap qararğa mömkinlek tä buldı.

Kiçädä qotlawlar konsert nomerları belän aralanıp bardı. Üz qotlawların törle fakul'tet dekannarı citkerde. Süzne tatarça başlap, rusça tämamladılar. Tatar bülegeneñ dekanı İskändär Ğiläcev ta, tatarça ber-ike süz äytäm dä, rusça söylärmen dide. Bälki, ul çit illärdän kilgän qunaqlarnı räncetmäskä telägänder, ämma alarnıñ kübese üzläre ük tatarça söylädelär. Äytik, amerikadan kilgän James Major tatarça söyläde, axırdan törekçä, ğäräpçä, rusça häm inglizçä qotlap ta quydı.

Konsertta yasalğan çığışlarğa kilsäk, Konservatoriäneñ xalıq uyın qoralları ansamble berdän-ber tatar köyen uynadı. Ä menä, italyan, rus köyläre muldan yañğıradı. “Qazan” biü ansamble ispan häm irland milli iyüllären başqardı. Fakul'tet studentları da törekçä, ğäräpçä cırladılar. Rus romansı köyenä pantomima kürsättelär, rus xalıq biüen dä kürsättelär, xätta. Könçığışqa ruslar qaysı yağı belän yaqındır inde. Qıtay, ğäräp, törek mädäniätläre yanında tatarnıqı yatışsızdır da, bälki. Üzeşçännär däräcäsendä genä bulsa da, üzebezneke bit. Tatarnı räncetmäsen öçen genä tügel, cıyılğan qunaqlarğa däwlät däräcäsendäge tel, mädäniätneñ güzäl ürnäklären kürsätä äybäträk bulmas ideme.

Tuğan telne onıtmas öçen yazuçı, jurnalist yäisä tel belgeçe genä bulırğa kiräk mikän? Mäclestä siksän protsentlap keşe tatar bulğandır, möğayın. Ä bit tel, mädäniät, millät tulayım alğanda şuşındıy kiçälärdän äkrenläp kenä formalaşa da kebek. Mul'tikul'turalizm ütep kergän çorda tatar mädäni ürnäkläreneñ dä massağa yoğıntısı bulmas mikän digän soraw belän tuqtalası kilä.

Aydar Camali

XS
SM
MD
LG